Khliehriat, Kyllalyngkot 15: Ka Jaiñtia National Council (JNC), lyngba u kyrwoh na u General Secretary, u bah Wanshwa Suting, ka kwah ban pynshai ha kaba ïadei bad kato ka jingjia ha Tuber Kmai shnong kaba la jia myn ha ka 03/01/2024 kaba la saphriang sha ki social media ha kaba na ka liang ka jingong ne statement jong u Waheh Shnong, u bah Miki Lyngdoh, uba la ong ba u Training Phawa, uba dei u dkhot ka JNC u mut ban pyniap syndon ïa u bad ïa uwei u dkhot shnong.
U General Secretary sengkmie, u pynshai ba naka liang ka seng ka la dep leh ïa ka jingtohkit bad la shem ruh ba ka jingkynthoh bad jingpharep ïa u Training Phawa, uba dei u Finance Secy JNC kam shym la ïahap satia kum kata ka jingkynthoh bad lah shem ruh ba ka jingpharep ïa u ka long kaba bakla bad kaba bym shongnia.
“Haka jingtohkit la shem ba nyngkong hi ka la don ka jingshah shoh shwa kiba ha ïing ha sem jong u bah Training Phawa bad kita kiba la shah shoh hangta ki la phone ïa u bah Training bad ma u ruh da ka jingtieng ioh ka jia eiei u ruh u la wan hangta na ka bynta ban pyniakhlad ïa kita kiba ha ïing na ka jingshahshoh, hynrei u la shah shoh pynban ma u bad ban lait na kata ka jingshah shoh bad ban ïada ruh ïalade bad ïa kita kiba ha ïing ka la don ka jingpynphai liang, hynrei ka jingmut hi ka jong u Training kadei ban ïada ïalade bad ïa kita kiba ha ïing”
“Hadien kane ruh naka liang u Training u la pan map na u Waheh Shnong bad ong ba um mut satia ba kato ka jingjia kan sa jia da kumto” ong u kyrwoh.
“U wei uba la shah shoh ruh uba kyrteng Shynna Shylla ba haka jingleit check medical la paw ba u la shah shoh shisha bad lah don ruh ki dak mong na ka jingshahshoh”.
U bah Wanshwa Suting, u la pynpaw ruh ba “ha kato ka jingiaid rally jong ka Shnong Tuber kmaishnong, ban Rai pynrem ïa u Training Phawa, na ka liang ka seng ka shem ba kane ka jingiaid rally kadei kaba lah shim rai u Waheh Shnong shimet namar ha ka jingshem ka seng katkum ki social media ki WhatsApp lah shem ba ïa ka jingkhot rally la wan na u khliehduh ka Dorbar Shnong kaba mut u Waheh Shnong hynrei ym na ka EC lane ka Dorbar Shnong, kane ka jingleh jong u Waheh Shnong ka lah ialam bakla shi katdei eh ïa u Paidbah bad ka la shim ruh ïa ka jingktah haka bor pyrkhat (mentally harrasment) jong u Training bad ki dkhot kumjuh ki nongïalam ka seng bad kane ka lah ban ïalam sha ka jingjia ba sngewsih bad ka long ruh pyrshah iaka aiñ. Katkum ka jingtip ka jong ngi, ba haba don kaei kaei ka jingjia hapoh shnong dei ban bishar ha ka Dorbar Shnong ym ban iadie iathied khamtam sha ki social media hynrei kane ka jingleh u Waheh Shnong imat ka don kaei re kaei sha lyndet bad ha kato ka jingiaid rally ruh lah paw ka kyrteng ka seng ha ki pla card bad banner bad kane kala ktah ym tang ïak ka kyrteng hynrei wat ïa ka burom jong ka seng bad ki nongkyrshan jong ka seng”
“Na ka liang ka seng ka kwah ban pynshai shuh shuh halor kato ka jingkren ne ka statement u Waheh Shnong ba kaei ka synjam ba ka seng kan shim, nyngkong ka seng hi ka kwah ban pynpaw ba ka seng hi kam juh kyntu ïa ki dkhot lane ki nongïalam ban pynkulmar lane thaw kulmar hapoh shnong poh thaw hynrei dei ban nang ban burom ïa ki nongïalam shnong bad ïa ka ri hi baroh kawei bad ka seng ruh kam juh khang ban ïada ïalade ha kino kino ki bynta kiba ktah ïa ka met lajong ba wat ka aiñ ruh ka shah ban ïada ïalade (self defence)”
“Ka seng ka phah ïa ka kyrwoh kaba shai khamtam ïa u Waheh Shnong ka Tuber kmaishnong ba dei ban wanrah noh ïa ka jingsuk, ka jingshngaiñ hapoh shnong bad ban tehlakam ruh katkum ka aiñ ym ban iadie iathied sha ki lad pathai khubor, namar ka district council ruh ka la bynshet ha ki shnong ba dei ban don ka jingbishar shnong lane ka village court khnang ban tehlakam ïala ka jingbha ka jingmiat jong ka shnong bad ban wanrah ruh ïa ka burom jong ka shnong bad ruh ïa kane ka bynta ruh ka la don mynta ha ka kti jong ka iïngbishar district session court bad ai ba kaei ka iïngbishar kan rai bad kata ka dei ka jingbishar kaba dei hok bad ngi shaniah ruh ha ka jingbishar jong ka iïngbishar ” pynkut u kyrwoh.
