Ïaid beit ka public hearing jong ka M/s Green Valliey Industries, EJHD khlem don kano kano ka jingpyrshah

Khliehriat nohprah 15: Ka public hearing jong ka M/s Green Valliey Industries Ltd kaba ju tip ruh kum ka Max Cement, kaba don ha Nongsning, East Jaiñtia Hills District kaba la pynlong mynta ka sngi ha Madan Pyrda Block-2 ha shnong Chieruphi ka la iaid beit khlem da don kano kano ka jingpyrshah bad baroh kiba la ai jingkren halor rynsan ki la ai ka jingkyrshan ïa katei ka company.
Katei ka public hearing ka long halor ka jingthmu jong ka Green Valliey Industries Ltd ban tih ïa u mawshun na ka par kaba don ha katei ka jaka Madan Pyrda ha shnong Chiruhphi, ka par kaba heh 10.71 hecter, la mang ruh ban tih ïa u mawshun 400602 MT shi snem.
U Waheh Shnong, Secretary shnong lem bad ki dkhot ka shnong Chirehruphi lem bad kiba na bar shnong kiba la ai jingkren ha rynsan ki la ai ka jingkyrshan bad ong ruh ba na ka liang ka Dorbar Shnong Chiriehruphi ka la ai ïa ka syrnot NOC bad shah ïa ka Max Cement ban tih ïa u mawshun na katei ka par kaba don hapoh shnong bad kyntu ruh ïa ki bor kiba halor ba kin sngewbha ban ai noh ïa ka Environmental Clearance ïa katei ka company ba kan ioh ban tih ïa u mawshun.
U bah Dametryo Rymbai, uba dei ruh u Secretary Shnong barim jong ka shnong Chiehruphi u la ong ka ka Dorbar shnong ka la ai ïa ka syrnot NOC ïa kane ka Green Valliey Industries bad ka la don ruh ki jingiateh kular bad ka shnong, la ong ruh ba la leh ïa kane khlem kano kano ka jingleh bor ne khlem da pynbor ïano ïano ruh ha shnong hynrei la ai ïa ka NOC da ka jingiasngewthuh jingmut lang jong baroh ki nongshong shnong, ha kajuh ka por, u la kyntu ïa ki bor kiba halor ba kin ai noh ïa ka syrnot Clearance Certifiacte ïa katei ka company ba kan ioh ban sdang noh ïa ka project ban tih ïa u mawshun na katei ka par.
Ïa ka jingïalang la pynïaid da u Additional Deputy Commissioner ka East Jaiñtia Hills District, u bah G.Warjri ha ka jingdon ryngkat lang u Environmental Engineer jong ka tnat Meghalaya Pollution Control Board, u bah Y.F.Laloo.
U bah Warjri u la pynshai ba kane ka jingpynlong public hearing ka dei ka rynsan ha kaba kiba kyrshan bad kiba pyrshah ki lah ban pynpaw iala ki jong ki jingpynsngew jong ki halor rynsan.
Na ka liang u Environmental Engineer jong ka tnat Pollution Control Board Meghalaya, u bah Y.F.Laloo, u la pynshai halor katei ka project tih mawshun jong ka company bad ong ruh ba na ka liang ka tnat Pollution kan sa phah ïa ki kaiphot jong kane ka public hearing, ki video bad ki dur ba la ring ha kane ka sngi sha ka tnat State Environmental Impact Assessment Authority ban shim ïa ka rai ha kaba ïadei bad ka jing ai ïa ka syrnot Environmental Clearance sha ka Green Valliey Industries.
Kiba la ai jingkren ki kynthup, u Waheh Shnong Chriehruphi, u bah From Rymbai, Secretary Shnong, u bah Ebordame Talang, Waheh Shnong ba rim, u bah Lambha Dkhar, u dkhot ka dorbar shnong Chriehruphi, u bah Dametreo Rymbai, u bah Pynthymmai Suchiang, u bah Mebanker Rymbai bad kiwei kiwei.
Na ka liang u Environmental Executive jong ka company M/s Green Valliey Industries Ltd, u H.P.Gupta u la pynsngew ia ka jingpynshai kaba iadei bad ka rukom ban pyntrei ia kane ka project ban khlong ïa u mawshun na katei ka par ka ban nym ktah ïa ka mariang bad ban ai ka jingiada ruh ïa ki nongtrei ki ban trei ha ka par.