Ïaid beit ka jingthep vote ha ki saw Polling Station Wapungskur bad ha Bataw
Syrtap ki bor Pulit ban pynkhlaiñ ïa ka jingpahara
Khliehriat, Rymphang, 22: Ka jingthep vote ha ki saw tylli ki polling station kiba don ha shnong Wapungskur bad ha shnong Bataw ha ka sngi Saitjaiñ ki la ïaid beit haduh kaba kut ryngkat ka jingpynkhlaiñ bha ïa ki bor pahara ha ki jaka thep vote.
` Ka jingpynlong biang ïa ka jingthep vote ha Wapung Skur A bad Wapung Skur-B Polling Stations kiba hap hapoh ka Musniang-Rangad Constituency bad ha Bataw A bad Bataw B kiba hap hapoh ka Bataw-Lakadong Constituency ka long hadien ba ki briew ki bym lah ban ithuh durkhmat, ha ka sngi Thohdieng kaba dei ka sngi thep vote, ki la rung jubor ha kine ki Polling Station bad pynpait ïa ki Electronic Voting Machine (EVM) kat haduh ba ki bor synshar jong ka East Jaiñtia Hills ki la hap ban pynsangeh noh shisyndon ïa ka jingthep vote.
U Superintendent of Police jong ka East Jaiñtia Hills District, u Giri Prasad u la ïathuh ba la pynkhlaiñ ïa ki bor pahara haduh san shah ha ki saw tylli ki polling station, kata, ha Wapungskur bad ha Bataw, ha kaba la pahara lang ruh da ki Pulit Home Guards na ka bynta ban pynneh ïa ka shongsuk shongsaiñ.
Kat haduh kaba la kut ka jingïathep vote, ka jingpoi jong ki nongthep vote ha Bataw ka long 1337 ngut ha kaba ki shynrang ki don 659 ngut bad ki kynthei 678 ngut.
Ka jingthep vote ha Wapung skur-A ka la kynjoh haduh 85%, ha Wapung skur B-83%, Bataw A- 80.5% bad Bataw B- 77%.
La sakhi ruh ba ki bor pahara ki la pyrkhing bha ki jingpahara ha ki jaka thep vote ha Wapungskur bad ha Bataw tat haduh da kut ka jingthep vote jong ki paidbah bad haduh ban da rah ïa ki EVM sha ki Strong Room ha ophis Deputy Commissioner ha Khliehriat.
Ha kaba ïadei bad ka jingshah thombor jong ki saw tylli Polling Station ha ka sngi Thohdieng ki Pulit ki la register case bad sdang ban pynlong ïa ka jingtohkit ban ïohkem ïa ki briew kiba donkti.
“Ngi ladep register case bad ka jingtohkit ka la ïaid shakhmat,” ong u Superintendent of Police ka East Jaiñtia Hills u Giri Prasad.
U la ong ba haduh mynta ki Pulit kim pat kem satia ïano ïano ruh.
Kum ban shu pyntip, marmar u Director Inpector General (Eastern Range) Davis N.R Marak, u Deputy Commissioner u S. Awasthi bad u SP u Giri Prasad ki hiar sha ka shnong Wapung ban pynlong ïa ka jingtohkit halor kane ka jingjia.