Ïaid beit, ïaid ryntih ka jingthep vote ki paidbah ha ki ar tylli ki constituency ha East Jaiñtia Hills District

Khliehriat Rymphang 27 : Ka jinthep vote jong ki paidbah mynta ka sngi, ha East Jaiñtia Hills District ha baroh ki polling station, ka ïaid beit ïaid ryntih khlem don kano kano ka jingwit, ki nongthep vote ki la ioh ban thep ïa ki vote jong ki kaba dei ka hok jong ki kum ki nongthep vote jong ka ri, ka jingpoi ki nongthep vote sha ki polling station ka long haduh 89.68 percent na ka 5- Sutnga Saipung Constituency bad 90.74 percent na ka 6-Khliehriat Constituency
Ka East Jaiñtia Hills District, kaba don ïa ka jingheh (Geographical Area) kaba 2,115 Sq Km, ka don ïa ki khappud bad ka ri Bangladesh kaba haduh 54 km bad ka khappud bad ka Assam kaba 120.68 km, ka don ar tylli ki Assembly Constituency ba kynthup ka 5-Sutnga Saipung Constituency bad ka 6-Khliehriat Constituency, kaba don haduh 91,713 ngut ki nongthep vote, ba kynthup 45055 ngut ki shynrang bad 46658 ngut ki kynthei, ka don 151 tylli ki polling station ba kynthup 78 tylli kiba dei jong ka 5-Sutnga Saipung Constituency bad 73 tylli jong ka 6-Khliehriat constituency.
Ha kitei ki ar tylli ki constituency ki la don shiphew ngut ki kyrtong kiba la ïa ai reng ha kane ka Assembly election jong u snem 2023 kiba kynthup hynriew ngut na ka 6-Khlriat Constituency, u bah Kyrmen Shylla na ka party UDP, , u bah Nehlang Lyngdoh na ka party NPP, u bah Damewanhi Rymbai na ka party VPP, u bah Bhayes Chyrmang, na ka party BJP i kong Jhanika Siangshai, na ka party INC bad u bah Sunida Bareh na ka party TMC.
Ki saw ngut kiwei pat ki kyrtong kiba ïakhun na ka 5-Sutnga Saipung Constituency, ki kynthup u bah Shitlang Pala na ka party UDP, u bah Vincent Pala na ka INC, ka kong Santa Mary Shylla na ka party NPP bad u bah Krison Langstang na ka party BJP.