New Delhi, Risaw 9 : Ka India bad ka Saudi Arabia ki la ïasoi ïa ka Memorandum of Understanding ha Riyadh mynta ka sngi ha ki kam kiba ïadei bad ka jingpynïasoh ïa ki kam bording, ka green hydrogen bad ka hydrogen ba khuid bad ruh ki lad pynbïang mar.
Ïa ka MoU la soi hapdeng u Myntri Sorkar Pdeng ba dei khmih ïa ki tnat Kam Bording bad Ka Bording ba Thymmai bad kaba lah ban Pynthymmai, jong ka Sorkar Indïa, u R.K. Singh bad u Myntri ka Sorkar Saudi Arabïa uba dei khmih ïa ka tnat Kam Bording, u Abdulaziz bin Salman Al-Saud ha ka jaka ba pynlong ïa ka MENA Climate Week ha Riyadh mynta ka sngi.
Kane ka MoU ka thmu ban tei ïa ki rukom ïatreilang hapdeng ki ar tylli ki ri ha ki kam kiba ïadei bad ka jingpynïasoh ha ki kam bording, ka jingïasam ïa ka bording ha ka por ba donkam bha bad ki jingjïa ba kynsan; ka jingtei lang ïa ki projek; ka jingpynmih lang ïa ka green hydrogen bad ka hydrogen ba khuid bad ka bording na ki tyllong ba lah ban pynthymmai.
Ki lad pynbïang mar kiba pyndonkam ha ki kam green hydrogen bad ka hydrogen ba khuid bad ki kam bording na ki tyllong ba lah ban pynthymmai. Kine ki Myntri ki la rai ban pynlong ïa ki B2B Business Summit bad ki jingïakren B2B hapdeng ki ar tylli ki ri ban tei ïa ki lad pynbïang bad pynbha ïa ki mar ha kine ki kam halor.
Hashuwa kane, ka kynhun na ka ri ba la ïalam da u Myntri ki tnat Kam Bording bad Ka Bording ba Thymmai, u R.K. Singh ka la ïashim bynta ha ka High-Level Segment jong ka “Middle East and North Africa (MENA) Climate Week 2023, kaba long ha Riyadh, Saudi Arabïa naduh ka 8 haduh 12 tarik u Risaw, 2023. Ka MENA Climate Week 2023 ka ïakren shaphang ki jingpynbeit ha ki kam kiba ïadei bad ka jingkylla ka suin bneng shuwa ka COP28 bad ka dei kaba pynlong da ka Sorkar jong ka Hima Saudi Arabïa.
Kane ka dei ka prokram kaba donkam kaba wanrah lang ïa ki briew bapher bapher kiba ïadon bynta ha ki kam bapher bapher kum ka Global Stocktake, bad ki bynta kiba ïadei bad ka jingshngain ha ka ioh ka kot bad ka bording ha kaba ïadei bad ka Paris Agreement.
Kane ka plié lad ban ïasamïa ki jingshem bad ki rukom treikam ba bïang tam bad ruh ban saindur ïa ki rukom pynbeit ïa ki jingkylla ka suinbneng ha kine ki snem ban wan.
Ha ka jingkren ha ka bynta “Global Stocktake of the Paris Agreement (GST) Regional Dïalogue: Highlighting enablers and technologies for ambition and just and inclusive transitions” ha ka sngi kaba nyngkong jong ka MENA Climate Week ha Riyadh mynta ka sngi,
u Myntri ki tnat Kam Bording bad Ka Bording ba Thymmai u la ong ba ka MENA Climate Week ka long kaba donkam bha ha ka jingwad bad ka jingïasam ïa ki lad ban tei ïa ka lawei jong ka kam pynmih bording, ka jingpyndonkam ïa ka bad ka jingïaineh ha kylleng ka pyrthei.
U la ong ba ka jingïalang ha ka MENA CW ka long kaba kongsan ïa ka thain MENA bad ba ka don ki lad kiba bun ban wanrah ïa ka jingkylla ha ka lawei jong ka rukom pyndonkam ïa ka bording.
U Myntri u la ong ba ka Indïa mynta ka dei ka sur kaba donkam bha ha ki kam bording bad ba ka la kylla sha ka nongïalam ha ki jingkylla ha ki kam bording. “Ka Indïa ka don jan 17% ki briew ha kane ka pyrthei bad lyngba ka jingdon ka ioh ka kot kaba ha ka kyrdan kaba san, ka la shim ïa ki sienjam ban pynduna ïa ki jaboh na ka GDP da 45% shuwa u snem 2030 bad kot sha ka thong Net Zero shuwa u snem 2070.”
U la ong ba ki kam bording ha Indïa ki la ïaid lyngba ki jingkylla kiba thmu ban pynbïang ïa ka bording kaba ryntih, kaba jemdor bad kaba ïaineh ïa ki briew jong ka ri. Ka ri ka la ïaidshaphrang ha ka jingkyntiew ïa ka bor pynmih bording na ki tyllong non-fossil, ka la tei ïa ka unified national grid bad ka la pynkhlain ïa ki lad pynbïang bording.
Ka jingkyntiew ïa ka bording kaba lah ban pynthymmai, ka jingplie lad shuh shuh ban ioh ïa ka bording bad ka jingai bording ïa baroh ki longiing ha ka ri, bad ruh ka jingpyntreikam ïa ki polisi ba saindur thymmai.
U Singh u la ong ba ka green hydrogen ka don lad ban pynstetïa ka jingkylla ha ki kam bording ha Indïa. “Nga kmen ban ïathuh ïa phi ba ka Sorkar Indïa ka la sdang ïa ka National Green Hydrogen Mission ban pyndonkam ïa ka bording hydrogen bad ka la ai jingmynjur ïa ka jingbei tyngka haduh US $ 2.3 billion na ka bynta kane ka Mission.”
U Myntri u la kyntu ïa ki ri MENA ba kin ïasoh bad ka Global Biofuel Allïance khnang ban rah shakhmat ïa ka jingïatreilang ki ri na ka bynta ki biofuel kiba ïaineh bad ruh ban kot sha ka thong jong ka Allïance.
U la ong ba ka Allïance ka thmu ban wanrah ka jingïatreilang ban pynkhlain ïa ka jingpynmih bad jingpyndonkam ïa ki biofuel ba ïaineh, ban plié lad ïa ka jingkhaii ïa ki biofuel bad ruh kiwei kiwei ki kam ha ka jingïatreilang bad ki kynhun na ki ri bapher bapher ba trei ha ki kam biofuel.
U myntri u la ong ba ka Indïa ka ngeit skhem ba baroh ki ri ki dei ban sngewthuh ba ki jingkylla ha ki kam bording kin wanrah ïa ki lad bad ki jingeh ïa ki ri ba dang kiewshaphrangbad ïa ka thain shathie jong ka pyrthei. “Kumta, ka long kaba donkam bha ïa ngi ban ïatrei lang ban kyrshan iwei ïa iwei ha kane ka jingkylla.”
U Singh u la ong ha ka MENA Climate Week ba ki sienjam shimet bad ki rai ban im ha ka rukom kaba ïaineh ki long kiba donkam bha ban kot sha ka thong ban wanrah jingkylla ha ki kam bording ha ka rukom kaba ïaineh. “Ha kaba ïadei bad kane, nga kyntu ïa ka thain MENA ba kan ïasoh bad ka sienjam Lifestyle for Environment (LiFE) jong ka Indïa”, la ong u Myntri.
Ka GST (Global Stocktake jong ka Paris Agreement) regional dïalogue ha ka Middle-East and North Africa (MENA) Climate Week kan wanrah lang ïa ki nongshna polisi bad kito kiba ïatreilang ha ki kam ba kin ïakren shaphang ki mat ba kongsan na ka thain da ka jingthmu ban saindur ïa ka jingmih na ka GST.
Ka jingïakren kan long ka rynsan ban ïakren shaphang ki jingeh, ki jingthut, ki jingpynbeit bad ki lad ban kyntiew ïa ki kam ban tehlakam ïa ka jingkylla ka suinbneng bad ka jingkyrshan ïa kine ha kaba ïadei bad ka MENA bad ruh ban kyntiew ïa ka jingïatreilang hapdeng ki ri.
Ka GST ka plié lad ïa ki ri ba kin peit ïa ka jingpyntreikam ïa ka Paris Agreement ban peit ïa ka jingïaid shaphrang ha ka jingpynurlong ïa ka jingthmu jong ka Agreement bad ki thong kiba heh jong ka. Ïa kane la leh ha ka rukom kaba pura bad kaba plié lad ha kaba la peit ïa ki lad pynduna, ki jingkylla bad ki lad ban pyntreikam bad ki jingkyrshan katkum ka jingryntih bad ka jingstad science kaba don.
Ka GST kaba nyngkong ka la long ha Glasgow ha u snem 2021 bad kan kut ha ka Climate Change Conference ha Dubai, UAE (ha ka COP 28). Ki jingmihna ka GST kan ai jingmut ïa kito kiba don bynta ha kane ka kam ba kin pynthymmai bad pynkhlain, ha ka rukom kaba la jied da ka ri, ïa ki sienjam bad ka jingkyrshan, ha ryngkat ka jingkyntiew ïa ka jingïatreilang hapdeng ki ri ban tehlakam ïa ka jingkylla ka suinbneng.
Ka jingkut jong ka global stocktake kaba nyngkong ka dei ka por kaba kongsan ha ki kam sain pyrthei ban pyni ïa ka jingïaid lang shaphrang ha kylleng ka pyrthei ban pynurlong ïa ki kyndon bad ki jingthmu jong ka Paris Agreement.
Ka dei ka por kaba kongsan ban pyni ïa ki jingeh bad ruh ïa ki lad kiba bun ban pynstet ïa ki kam ban tehlakam ïa ka jingkylla ka suinbneng bad ki kam kiba kongsan ha ki thain bapher bapher. Ka long ruh kaba donkam bha ha ka jingpyni ïa ka khubor kaba bha jong ka jingïatylli bad ka jingïatreilang.
