Jowai, Jymmang 05: Ka kynhun ïalehkai jong ka Mowkaiaw CYC bad ka Khliehtyrshi SC kila ïoh ban ïa sam mar shi point, haka jingïalehkai jong ka District Cricket League 2025 bala pynïaid da ka West Jaiñtia Hills District Cricket Association (WJHDCA) mynta ka sngi 6 tarik u Jymmang ha Mini Stadium, Khliehtyrshi.
Haba phai sha ka jingïalehkai mynta ka sngi ïa ka jingkynting toss la jop da ka Mowkaiaw CYC kaba la kam trai ban tied nyngkong. Ka Mowkaiaw CYC haba leit tied nyngkong ka la tied 132 runs na ki 20 over bad liem 9 wickets. U Sanvert B Kurkalang ula lam khmat napdeng ki nongtied jong ka Mowkaiaw CYC da kaba u la tied marwei 42 runs na ki 27 balls ryngkat 2 tylli ki Six (6s) bad 3 tylli ki Fours (4s). U Wimisonroy Lyngdoh pat ula tied 20 runs (khlem out) na ki 13 balls ryngkat bad 2 tylli ki Six (6s). U Demi Dkhar, nongkawang ball jong ka Khliehtyrshi SC u la ïoh ban khyrwit 2 wickets na ki 4 over.
Ka Khliehtyrshi SC ha ka pali jong ka ban beh ïa ka thong, kala ïoh lad ban tied tang na ki 3.4 ober bad ïoh 8 runs da ka ba liem noh 2 wicket. Hadien nangta u slap u bajur u la hiar bad neh slem bha bad pynlong ïa ka madan baroh kawei ban dap um smam.
Hadien ba ap katto katne por, ki Umpire ki la leit ban peit bniah ïaka Madan bad la ïohi ba ym long shuh ban bteng ïalehkai kumta ïaka jingialehkai la hap ban pyndam noh bad ki Captain jong baroh ar ki team ki la mynjur ban ïa sam mar shi point ha kane ka sngi.
Ka jingïalehkai ha ka sngi Thursday 08/05/2025 kan long hapdeng ka Moodymmai SC pyrshah ïaka Evergreen Mukhla Mission naduh ka por 8 baje shiteng mynstep.
