Leit kynduh Myntri Sports ki nongïalam ka HSPDP ban kyntiew ïa ki jaka ïalehkai ha West Khasi Hills

Nongstoiñ, Jymmang 06: Na ka bynta ban kyntiew ïa ki samla ha ki kam ïalehkai sport ki nongïalam ka Hill State People Democratic Party Youth Wing jong ka West Khasi Hills, ha ka lah sngi u Blei ki la leit ban ïakynduh ïa u bah Shakliar Warjri MLA ka Mawthadraishan u ba dei ruh u Myntri jong ka tnad Sport & Youth Affair ha ka sorkar jylla.
Ha u kyrwoh ba la pyllait da u bah Wellesly Lyngkhoi President bad u bah Thomas Kharbani secretary, la ong ba ka jingleit ïakynduh jong ki ïa u Myntri ka tnad sport, ka dei namar ba kumba ka long mynta bun bah ki samla jong ka West Khasi Hills ki dei kiba don ka sap ha ki kam ïalehkai ba bun jait, hynrei na ka jingbym biang ki jaka ai jinghikai kum ki madan bad kiwei kiwei, ka sap ba ki samla ki don ka shu sep ei namar kim ïoh lad ban praktis ha ki madan kiba la biang.
Nalor kata ki samla ïalehkai sport na West Khasi Hills ki la leit ban ïashim bynta ruh ha ki lympung ïalehkai kiba bun hapoh ka jylla bad shabar ka jylla ruh, ha kaba ki la wan rah ïa ka nam bad ka burom ïa ka district bad ka jylla hi baroh kawei. Kumta na ka liang ki nongïalam ka HSPDP Youth wing ki don ka jingsngewkhia bad ka jingkitkhlieh na ka bynta ki para samla hapoh ka district.
Nalor kata kitei ki la ong ruh ba kawei pat ka mat kaba ki nongïalam ka HSPDP Youth wing ki don ka long ba lada ki madan ïalehkai ki dei kiba la bit la biang, kin khring ïa ki samla sha ka kam ïalehkai bad kan pynduna ruh ïa ki samla ba kin ngop ha ki jingmlien ba sniew kum u drok, ka kyiad bad u kynja namar ka jingpynmlien ha ki kam ïalehkai ka dei kawei ka lad kaba bha tam ba kin lait na kitei ki jingmlien ba sniew.
Kitei ki nongïalam ki la ong ruh ba ha katei ka jingleit ïakynduh jong ki ïa u Myntri ka tnad sport, ki la aiti ruh da ka jingthoh ban kyrpad ïa u ba un kyrpad ïa ka sorkar ba kan mang pisa kyrpang na ka bynta ban pynbha ïa ka madan New Nongstoiñ da kaba siang artificial turf, pynbha ïa ki nala um, pynbiang bording hapoh madan bad kiwei kiwei ki jingdonkam.
Nalor kata ha ka jingthoh ba ki la aiti ha u Myntri ki la pynsgew ruh ba un kyrpad ïa ka sorkar ba kan pynbit pynbiang ruh ïa ka madan ïalehkai ha Rambrai, namar ka madan ïalehkai ha Rambrai ruh kam pat biang satia nadong shadong. Lada ka madan ha Rambrai ka la bit la biang kan long ka jingkyrkhu kaba khraw ïa baroh ki samla ka thaiñ Rimen bad kan kyntiew ruh ïa ki samla ka thaiñ kiba don sap ha ka kam ïalehkai.
Ha katei ka jingthoh la kyrpad ruh ïa u Myntri ba un pynïoh jingïarap da ki tiar na ka bynta ka Archery bad ban pynsngew ha ka sorkar ba ka madan na ka bynta ka jingïasiat khnam ka la don kam haduh katta katta ha West Khasi Hills na ka bynta ban pyntbit ïa ki samla ha ka jingïasiat khnam.
Ki samla nongïalam jong ka HSPDP ki la pynsngew sha u Myntri ba un ïakren bad ka sorkar ban wanrah ïa ka Meghalaya Games ha Nongstoiñ ha ki snem ban wan. Ki la ong ruh ba ha katei ka jingleit ïakynduh jong ki u Myntri u la kular ban shimkhia bad ban pynsngew sha ka sorkar, ba kan pynurlong kham kloi ïa katei ka jingangud jong ki khnang ba ki samla ka West Khasi Hills, kin nang kiew shaphrang ha kam ïalehkai sport bad kan long ruh ka burom na ka bynta ka district bad ka jylla hi baroh kawei.