Shillong, Ïaiong 10 : Ka jingïalang jong ka Drug Reduction Elimination & Action Mission (DREAM) hapoh ka jingïalam jong u Myntri ka tnad Social Welfare Bah Paul Lyngdoh, ha ka sngi Palei kala shim ïa ka rai ban don noh da ka jaka sumar kaba kyrpang ïa kito kiba kyrni dih drok lane ka Addict Treatment Facility ha Umsawli, New Shillong Township.
Haba pynbna ïa kane ka rai hadien ka jingïalang, u Myntri u la pyntip ruh ba kito kiba sah ha katei ka jaka sah kin ym donkam satia ban siew ei ei ruh.
La donlang ha kane ka jingïalang naduh DGP jong ka jylla, Kong Idashisha Nongrang, Director jong ka DREAM Mission Bah Francis Kharshiing, SP ka Anti-Narcotic Task Force (ANTF), ka DHS, Medical Superintendent jong ka Shillong Civil Hospital bad kiwei kiwei.
U Myntri u la ïathuh ruh ba ki don bun bha ki nongdih drok kiba shah ram na ki surok bad na kylleng ki bynta jong ka nongbah kiba ym don ki jaka sumar kiba biang kiban ïoh lang ïa ka jingsumar bad ruh ïa ka jingïa syllok ba kin lah ba kiar na kane ka jingkyrni.
“Kumta, ka jingïalang ha kane ka sngi ka la rai ban ïaid shakhmat ban don noh da ka Addict Treatment Facility. Ha kane ka ATF, ngin don ïa ki psychiatrists kiba la tbit bha, ki jaka thiah bad ki jaka sah nalor ka jingïasyllok na ka bynta kiba la kyrni. Kane ka sienjam ka long ba hadien ba ngi la pyndep lut ïa kine ki jingsumar bad ïa syllok, ki lah pat sa shisien ban wanphai biang sha ka imlang sahlang kum ki briew kiba thymmai.”
U Myntri u la ïathuh ba kane ka ATF kan don ha Umsawli, ha ka jaka ba don ka COVID Centre mynshwa bad kaba sah mynta ka long sa tang ban pynbiang ïa ki katto katne ki jingduna ha ka Centre naba ka Department ka la pynbiang lut ïa ka jingdonkam ki nongtrei.
La ïathuh ruh ba ha ki arsngi ban wan, ka kynhun ban ïalam da u Director ka DREAM Mission kan leit ban jurip ïa kane ka jaka ha Umsawli ban peit na ka bynta ka jingpynbit pynbiang.
Halor ka jingkylli, u Myntri ula ïathuh ba ka jingpynlut na ka bynta katei ka sienjam ka la don lypa bad ka Mission ha kaba ki la thmu ban ïaid khyndiat khyndiat. Tangba katkum ka jingong jong u ha ka kylla kaba nyngkong ki la khmih lynti ba kan poi la kumno kumno 50 – 70 lak tyngka.
La ïathuh ruh ba ka jingmang pisa ka la don bad ka tnad lyngba ka Ministry of Social Justice and Empowerment bad don ruh ki bynta na ka Health Department haba ïadei bad ka jingai jingsumar ïa kine kiba kyrni khlem donkam siew.
U Bah Paul u la ïathuh ruh ba ka jingdon ki briew kiba kyrni dih drok ka la nang hiar hynrei ki dang don bun pat ki jingeh namar kiba la ngop ki don lut ha baroh ki rta khamtam eh kito kiba dang khie bad wat kiba la heh bad rangbah ruh la ka long ha kaba pyndonkam bad wat hakaba pynïaid iew ruh.
