Ban ïoh noh ïa ki mashin talasi kali, dang buddien ka DGP na ka Ministry of Home Affairs

Shillong, Ïaiong 10 : U Myntri ka tnad Social Welfare ka sorkar jylla, Bah Paul Lyngdoh ha ka sngi Palei u la ong ba ka Director General of Police (DGP) ka jylla, Kong I Nongrang ka dang buddien mynta bad ka Ministry of Home Affairs ka sorkar pdeng na ka bynta ban pyndait noh da ki mashin talasi kali ha ki entry point kata ha Ri Bhoi bad ha East Jaintia Hills District na ka bynta ban khanglad syndon sbak ïa ka jingïoh rung u drok sha ka jylla.
“Ha ka jingshisha kane ka dei ka jingtyrwa na ka tnad Kam Pohiing ka Ri. Ki la pynpaw ïa ka jingsngewkhia ia ka thain shatei lam-mihngi jong ka Ri kaba kylla long mynta ka pdeng jong ki kam khaii drok bad dei halor kane ba ki la tyrwa ban ai ia kine ki mashin talasi shangi. Kumta, ka DGP ka don ha ka kam bad ka dang buddien ïa kane bad ka MHA,” ong u Myntri haba kren bad ki lad pathai khubor hadien ka jingïalang jong ka DREAM.
Na ka liang u Myntri u la pyntip ruh ba ka sorkar ka la thied 9 tylli ki ksew ba la hikai pyntbit ki ban long shi bynta jong ka kynhun ban ïarap ia ka Anti-Narcotic Task Force jong ka jylla ha kaban thwet bad lap ïa u drok uba thmu ban pynrung shapoh ka jylla Meghalaya.
“Ïa kine ki ksew la phah ban shah hikai pyntbit ha ki riew shemphang bad ynda la dep, kin sa wan ban donlang pat bad ka ANTF jong ka jylla ban ïarap ïa ngi ban lap ïa ki drok kiba rung shapoh ka jylla Meghalaya,” u la ong.
Halor ka jingkylli, u Bah Paul u la ong ba kane ka jingphah pyntbit kan sa dep noh ha kine ki khyndiat bnai ban wan bad kumta yn sa pyndonkam ïa ki ha ki jaka ba jur bha ka jingpynïaid ïew ïa u drok kumba la paw ha ka thup jong ka DREAM Mission.
U la ong ruh ba kum ka tnad ki la dep ban buh dak ïa kito ki jaka bad ki distrik kiba kham kynrei bad ïa kine ki jingtip ruh la buh ha ki rynsan ban ïohi paidbah.