Ïa ka rai ba khatduh ngin sa shim hadien ka jingïalang bad ka sengkmie ha Delhi: Rikman Momin

Shillong, Naiwieng 09: U Rikman Momin, President ka BJP ha ka jylla u la pynpaw ba katto katne ngut ki MLA bad MDC kiba mynta ki la wan ban ïakren bad kynduh ia ki nongialam jong ka party BJP, hynrei ïa ka rai jong ka jingrung jong ki yn sa shim hadien ka jingïalang kaba kongsan ha ka 15 tarik u Naiwieng bad ki nongïalam ka sengkmie na Delhi.
U la pynpaw ba ïa ka coordination committee na ka bynta baroh saw tylli ki mat ba la khlieh da u MLA ba mynta yn sa pynbna hadien ba la wanphai na Delhi. Ka kynhun jong ka sengkmie kan ïatreilang bad ki MLA bapher bapher jong ka komiti pynïadei khnang ba ki jingeh kin ïoh ban pynbeit kloi katba lah.
U la pynpaw ruh ba ka BJP jong ka jylla kan don ka bynta kaba kongsan bha ban pynbeit ïa ki jingeh da ka jingkyrshan kaba radbah jong ki MLA ka BJP. U Rikman Momin u la ai burom ruh ïa ki 8 ngut ki MLA kiba dang shu wan rung thymmai namar ba ki la rung sha ka BJP da ka jingthmu kaba shai ban pynbeit ïa ki phra tylli ki mat ba kongsan.
“Kane ka paw shai namar ngi lah ban ïohi kumno kiei kiei ki ïaid stet hadien ba ki la ïasoh bad ka seng. Ngi lah ban ïohi shai haduh katno ka sengkmie ka shim ïa ngi hadien ba ki jingkheiñ ki la nang kiew. Ïa ka jingktah kaba bha ruh lah ban ïohi hadien ba ka komiti dewïong bad ka komiti JPC ki la wan sha Shillong hadien ka jingkiew jong dkhot ka BJP ha ka jylla. Ngin pynthikna ba ka jingsngewtynnat jong ki tnat treikam Khristan ha ka jylla kan long kaba khlaiñ bad kaba dei hok. Ngin sa ïakynduh ïa u chairman ka JPC ha Delhi bad pyntip ïa u ïa ka jinglong jong ka party jylla jong ngi bad ai jingmut ïa ka lad kaba biang tam ban pynbeit ïa ki jingeh. Ïa ka jingeh ym lah ban pynbeit khlem ka jingïarap jong ka seng jylla. Ki briew ki dei ban sngewthuh ba lada ngi kwah ba kin kham bun ki mat kin pynbeit bad ka roi ka par kan stet, ki paidbah ki hap ban ai ïa ka BJP ïa ka jingbun paid kaba shai ha ka ïing dorbar bad nangta kin sa ïohi ïa ka jingkylla kaba bha kaba ka wanrah ïa ka jylla bad ki paidbah jong ka,” ong u Rikman Momin State President, BJP Meghalaya Pradesh.