Ba lah palat ïa ka por ba la buh, pynsangeh noh ka KSU ïa ka jingthang bom ha ka thaiñ Mawprem

Shillong, Naiwieng 09: Ka Khasi Students’ Union (KSU) Mawprem Circle ha ka sngi U Blei ka la pynlong ïa ka jingjurip bad leit sha ki bynta bapher bapher jong ka Mawprem ban pynsangeh ïa ki briew kiba dang thang bom hadien ka por ba la buh da ka District Administration.
Kane ka sienjam ka long hadien ba ka Seng ka la dep phah ïa ka dorkhas sha u Deputy Commissioner (DC), ban dawa ba dei ban pyntreikam hok ïa ki kyndon bad ki por ba la buh da ka Supreme Court ha kaba ïadei bad ka jingthang bom.
Ha kane ka jingleit jurip ka KSU ka la lap ba don ki longïing kiba khlem bat ïa ki hukum bad ki kyndon kumta ka la ïakren bad ki ba kin ai ka jingïatreilang bad ki bor district bad bor jong ka aiñ bad la ïohi ba kitei ki longïing ki la kohnguh bad sngap ïa ki jingkyntu na ka KSU bad ki bor pahara kiba la synranlang.
Ka Seng ka pynkynmaw ba katkum ka Notice ba la pynmih da ka District Administration lyngba u Magistrate, ka por ba la buh ban thang bom ka long tang naduh ka por 8 baje haduh 10 baje mynmiet.
Ha kaba ïadei bad kane, ka KSU Mawprem Circle ka pynshai ba kane ka sienjam kam dei satia ban khanglad ïa ki paidbah ban rakhe, hynrei ka long ban pynthikna ba baroh ki paidbah kin burom bad bud ryntih ïa ki kyndon bad ki aiñ kiba la buh da ki bor ba dei khmih.
Ha kane ka miet ka Seng ka la pynsngewthuh ïa ki ba kane ka jingrakhe kam dei ban long ka daw jong ka jingeh bad jingktah ïa kiwei pat, khamtam eh ïa ki para marjan. Ka la kyntu ruh ïa baroh ki ban long kiba don ka jingkitkhlieh, ban burom ïa ka aiñ bad ban pyrkhat lem ïa ka jingshong suk bad jingshngaiñ jong baroh.
Shuh shuh halor kane na ka liang ka seng ka la buh ruh ka jingkyrpad ïa ki paidbah ban long kiba kloi ban ïatreilang bad ka seng na ka bynta ka jingbha jingmiat lang jong baroh khamtam na ka bynta jong kito ki samla pule kiba dang pynkhreh mynta ïa ki eksam phainal jong ki skul bapher bapher naba kane ka jingpynbthei bom kaba la pynsawa palat ïa ka por ka ktah ïa ka pule puthi ruh jong ki, ong ka kyrwoh ba la phah da u Stefford Kharjahrin, Environment Secretary, KSU – Mawprem Circle.