Ïa ka jingïapynbeit pud ym lah ban shu rai tang da ki arngut ki CM ha Private Room : Saurav Gogoi

Shillong, K’lyngkot, 17: “Ïa ka jingïapynbeit pud ym lah ban shu rai tang da ki arngut ki Myntri Rangbah tang da ka jingïakynduh ha ka Private Room namaba ki briew kiba shah ktah kiba im ha ki jaka ba don ka jingïakajia pud ki dei ma ki ban ai ïa ka rai,” ong u MP ka seng Congress na Assam u Saurav Gogoi.
U Gogoi u la wan iuhkjat ha nongbah Shillong ha ka sngi Baar ban ïakynduh markhmat bad ki kyrtong ka seng Congress shwa ba ka All India Congress Committee (AICC) kan ai jingmynjur ïa ka thup kyrteng jong ki kyrtong ki ban aireng ha ka elekshon sha ka Iingdorbar Thawaiñ ka ban sa long shen.
“Kam dei ka kam shimet jong ki, kim lah ban shu ïakren sop sop ïa kane ka kam ïapynbeit pud tang hapoh iing, hynrei ka jingïapynbeit pud ka dei hapdeng ki ar tylli ki jylla bad nga tharai ba ka long kaba bakla ba kin shu shim ïa ka rai khlem da shim ïa ka jingmynjur jong ki paidbah kiba shong basah ha ki jaka ba shah ktah,” ong u Gogoi ha ka jingïakren bad ki lad pathai khubor.
Ka Sorkar Meghalaya bad ka Sorkar Assam ki la ïasoi ïa ka Dulir Ïasngewthuh Jingmut (Memorandum of Understanding) ha New Delhi ha ka 29 tarik, Lber, 2022 ban ïapynbeit ïa ki hynriew tylli ki jaka ba ïakajia pud ha ka wat kaba nyngkong.
U la kynnoh ruh ba Myntri Rangbah ka Jylla Assam u Himanta Biswa Sarma u dei uba ju mlien ban jyrwait ïa ki Myntri Rangbah jong kiwei pat ki jylla ban ïasoi ïa kaei kaei kaba kim kwah tang ban ïoh pynpaw pyrthei ba u dei shisha uta u nongïalam jong ka Northeast Democratic Alliance (NeDA).
“Namarkata, ki Myntri Rangbah jong kiwei ki jylla ki dei ban long kiba shemphang bad kiba lah ban pynkohnguh ïa la ki jong ki nongshong shnong hynrei ym ban shah jyrwait ha kito kiba shong ha Delhi lane ha Nagpur,” u la bynrap.
Une u nongïalam ka seng Congress u la takrain ruh ïa u Himanta Biswa Sarma bad ïa u Conrad K. Sangma halor ka jingïasoi ïa ka soskular ïapynbeit pud khlem da sngap ïa ki sur jong ki paidbah.
U la ong ruh ruh ba ka long kaei kaei kaba sngewsih haba ki arngut ki Myntri Rangbah ki ladep ïasoi ïa ka soskular hynrei ki dang mih pynban ki jingïakajia bad ki jingshah siat ïap jong ki briew ha khappud. “Ka dei ka jingtlot jong ka Sorkar bad baroh arngut ki Myntri Rangbah bad ka pynpaw ba kumno ka jingïasoi ïa ka soskular ka dei tang ban shu pyni dur katba ki dang bun ki jingeh kiba dei ban ïa pynbeit. Hynrei ka long kaba sngewsih ba kum kane ka juk, ki Myntri Rangbah bad u Myntri Rangbahduh ki sdang sa ïa ka politik shna dur,” la kynthoh u Gogoi.
Haba pynpaw ïa ka jingsngew jong ka Congress halor ka jingïapynbeit pud, u President ka Meghalaya Pradesh Congress Committee u Bah Vincent H. Pala u la ong ba ka party ka ju pynpaw ba dei ban don da ka Boundary Commission ban weng ïa kane ka jingeh kaba la sah pongding la slem bha.
“Ka Commission ka dei ban leit sha ki shnong, ban ïakynduh ïa ki Rangbah Shnong, ki Secretary Shnong, ki Syiem, ki Dolloi bad ïa ki paidbah shwa ban shim ïa kano kano ka rai. Ym kumba leh ka Sorkar MDA, ki shu ïakynduh tang ïa katto katne ngut ki nongkyrshan bad shu ïasoi noh mar mar. Hynrei ka Commission kaba ngi ïakren ka dei ban pyndep ïa ka jingleh sorjamin la kumno kumno 3-4 snem hynrei ym tang hapoh 3-4 bnai,” u la ong bad ïathuh ruh ba u ladep phah da ka jingthoh sha u Myntri Rangbahduh ka ri ban thaw ïa ka Boundary Commission na ka bynta ban weng ïa ka jingeh ha khappud.
U Bah Pala shuh shuh u la kynnoh ba ki Regional Committee ba la thaw da ki ar tylli ki jylla ki dei kiba la khlieh da ki politishian bad ki MLA
“Ka Sorkar ka la phiel namarba ki shu shahniah tang ha uwei ne arngut ki politishian u ban pyndep ïa ka kam tang na ka bynta ka jingmyntoi jong ki katto katne ngut ki politishian hynrei ym na ka bynta ka jingmyntoi jong ka jylla baroh kawei. Nalor kata, kine ki Regional Committee kim shym la ai ïa ka kaiphod sha ki paidbah hynrei ki la ai tang ha ki Myntri Rangbah….kane kam pat biang satia ban weng ïa ka jingeh ha khappud,” u la bynrap.
Ha kajuh ka por, u MDC na Mylliem u Bah Ronnie V. Lyngdoh uba long u nongïalam ka seng Congress u la ong, ka jingdawa ban phaidien biang ïa ka Memorandum of Understanding ka la wan na u MLA jong ka Rambrai-Jyrngam u Bah Kimfa S. Marbaniang, uba dang shu pynïasoh dang shen bad ka National People’s Party (NPP).
“Ym tang na ka seng Congress hynrei wat na ki dkhot lajong kiba la pynïasoh bad ka NPP dnag shen ki la dawa bad kane ka pynpaw ba ïa ka MoU la shu ïasoi khlem da shim lang ïa ka jingmynjur kynthup ruh wat ïa ki MLA lajong kiba dang shu pynïasoh bad ka party jong ki,” bynrap u Bah Ronnie.