I-League: Pyrshah ïa ka Churchill Brothers yn aireng ka Lajong mynta ka sngi
![](https://mawphor.com/wp-content/uploads/2024/03/WhatsApp-Image-2024-03-03-at-6.54.15-PM.jpeg)
Shillong, Lber 03: Ka kynhun ïalehkai phutbol jong ka Shillong Lajong FC kan bteng biang ïa ka jingïalehkai lympung I-League mynta ka sngi pyrshah ïa ka Churchill Brothers FC ha ka por 7 baje janmiet, shabar nala ïing ha madan phutbol ka liang pyrshah, ka Tilak Maidan ha Goa.
Shuwa ban jam sha kane ka jingïakhun ka Lajong ka la ïakhaid bad ka Rajasthan United ha ka jingïalehkai ba dang shen bad ka shong ha ka kyrdan ba 6 ha ka miej da 26 point bad ka duna da tang 1 point na ka Inter Kashi kaba bat kyrdan ba san.
Hynrei ka Lajong ka dang ïohlad ban kyntiew ïalade sha ka kyrdan ba san namar ka dang duna 2 sien ïakhun haba nujor bad ka Inter Kashi. Ka Lajong ka jop 7 sien, 5 sien ïakhaid, bad rem 4 sien naki 16 sien ïakhun naduh ba sdang ka samoi lehkai 2023-24.
Haba kren lamphang shuwa ban jam sha kane ka jingïalehkai, u head coach ka Lajong – u Bah Bobby L. Nongbet u la pynpaw ba ka kynhun ka la pynkhreh bha na bynta kane ka jingïakhun hadien ba ka kynhun ka la pynsepei ïa ki 3 point ha ka jingïalehkai pyrshah ïa ka Rajasthan United hynrei u ngeit skhem ba ka kynhun kan wanphai bad kan pynleit jingmut ïa ka jingïakhun mynta ka sngi.
Shuh shuh, u Bah Bobby u la pynpaw ruh ba ka kynhun kan ïakhun tyngeh ban khur pura ïa ki lai point bad ban pynduna ka jingïapher point bad ki kynhun ba shong ha ka thup Top 4 ha ka miej.
Haba phai pat sha ka Churchill Brothers, kane ka kynhun ka shong ha ka kyrdan ba 11, bad ka dang jop tang 4 sien, ïakhaid 5 sien bad rem 7 sien na ki 15 sien ïakhun ba ladep, bad ka dang khur 17 point.
Baroh arliang mamla ki kyrmen ban khur pura ïa ki lai point na kane ka jingïatyngkhuh ka jong ki ha ka lympung I-League mynta ka samoi.