Shillong, Naiwieng 21 : Ka Shillong Lajong ka bym pat shah rem kawei ruh ka jingïakhun mynta pat ka pynkhreh ban aireng pyrshah ïa ka kynhun jong ka Delhi FC ha ka lympung ïalehkai I-League kaban long mynta ka sngi Balang ha madan SSA Stadium, Polo ha ka por 2:00 baje nohphai sngi.
Ka kynhun hadien ba ka la ïoh ban khur ïa ki lai point ha ka jingïakhun pyrshah ïa ka Gokulam Kerala FC ha ka jingïakhun kaba dang shu lah shen, ka pynpaw ba ki don ka jingsngewskhem ba kin lah ban khur biang ïa ki lai point ha ka jingïakhun pyrshah ïa ka Delhi FC.
Lah ban kdew hangne ba ka Delhi ka don mynta ha ka kyrdan kaba saw ha ka miej ïa kheiñ point da ki 7 point hadien ba ka la khur ar tylli ki jingjop bad ïakhaid kawei na ki saw tylli ki jingïakhun.
Haba kren sha ki pathai khubor hynne ka sngi, shisngi shwa ka jingïakhun u coach ka Delhi FC u Yan Law u la pynpaw ba ka kynhun jong u ka la long kaba la pynkhreh bha khnang ba kan ïoh ïa ka jingjop ha ka jingïakhun pyrshah ïa ka kynhun trai jaka ka bym pat shym la shah rem shisien ruh. Hynrei u la ai pat ka jingïaroh ïa ka rukom ïalehkai bha ka Shillong Lajong kaba la ïoh ïa ka kabu ba pura lyngba ka jingkyrshan na ki paid nongshong shnong.
Ka Lajong FC ha kawei pat ka bynta, hadien ka jingjop ha ka jingïalehkai kaba khatduh bad laitylli ki jingïakhaid mynta ka la ïoh 6 point na ki sawtylli ki jingïalehkai bad wan hadien ka Delhi kaba la tam da 1 point.
Na ka liang u head coach ka Shillong Lajong, u Bah Bobby Nongbet haba kren sha ki lad pathai khubor u la pynpaw ïa ka jingangnud dik dik na ka bynta kane ka jingïalehkai ka ban long ha ka sngi Balang khamtam hadien ba ka kynhun ka la lah ban pynrem noh ïa ka Gojulam FC.
Hynrei, u la ong ba kin ym shim sting satia ha kane ka jingïakhun pyrshah ïa ka Delhi FC hadien ka jingjop ka jong ki pyrshah ïa ka Aizawl FC jngai na la ka jong ka jaka nalor ka jingdon ïa ki katto katne ki rangïalehkai kiba kynsai hapoh ka kynhun jong ki.
Kan dei ka jingïalehkai kaba itynnad bha namar baroh arliang ki la pynkhreh bha bad hadien ba kitei ki arliang ki la jop ha ka jingïakhun kaba khatduh kaba dang shu lah shen.
