Shillong, Nohprah 06: Ka kynhun ïalehkai jong ka Shillong Lajong FC ka la ïai bteng ban pynhun ïa u paid nongkyrshan ka jylla lyngba ka namjop pyrshah ïa ka Churchill Brothers da 2-0 kol ha ka jingïalehkai I-League kaba la long hynne ka Sngi ha madan SSA Stadium.
Kumban shu pynkynmaw, ka Lajong ka la ïakhaid ha ka jingïakhun shabar nala ïing pyrshah ïa ka Rajasthan United mar 1 kol, hynrei mar ïa wanphai jingïakhun hala ïing ka la khur biang ïa ka jingjop.
Kane ka namjop ka la kyntiew ïa ka kynhun ban jam sha ka kyrdan ba lai ha ka miej kheiñ poiñ mynta ka samoi bad sah hadien ka Sreenidi Deccan lyngba ka jingïapher kol (goal difference).
Haba bishar ïa ka jingïakhun, lah ban kdew ba ka Lajong ka la ïoh ban tehlakam kham bun shah ïa ka bol bad ñion khlem sangeh hapoh phyllaw kol jong ka kynhun liang pyrshah ha kane ka jingïakhun naduh kaba sdang haduh kaba kut.
Watla ka Lajong sdang khlem sangeh ban ñion ïa ka jingïalehkai hynrei kam shym la lah ban pyn seisoh ïa ka jingthmu thep kol. Kane ka jingbymlah pynkhihjar ka la neh shi slem dei tad ynda la jan kut ka kylla kaba nyngkong ba ka kynhun lyngba u Laiwang Bohham ka la ïoh ban thep (45 minit) ban ïoh lamkhmat ïa ka jingïakhun da 1 kol shuwa ban wai shiteng.
Wat hadien ba ka kynhun ka la ïoh ban lamkhmat lypa da shi kol hynrei ka Lajong kam shym la hun satia bad ïai bteng ban ñion tyngeh ïa ka Churchill ha ka kylla miet ban pynthikna namjop.
Kumba katto katne por ba la ïaid ka kylla miet, ka Lajong ka la ïoh shibun ki kabu kiba la sepei hynrei ha ka 51 minit ka kynhun ka la ïoh ban tam da ar kol lyngba ka penalty u Renan Paulino .
Ki la don ruh katto katne ki kabu ba ka Lajong ka la dei ban ïoh thep hynrei ki la lait sharud hynrei watla kata ruh kane kam shym la khanglad ïa ka kynhun ban pynthikna ïa ki lai point na kane ka jingïalehkai, bad ruh ka sien ba nyngkong ïa ka kynhun ban nym shah thep (clean sheet) napdeng ki jingïakhun mynta ka samoi.
Lyngba kane ka namjop, ka Lajong kan phaikhmat ban pynkhreh ïa ka jingïakhun ‘North-East’ Derby pyrshah ïa ka Aizawl FC la Sngi U Blei, (10 tarik Nohprah) ha ka por 2 baje nohphaisngi ha SSA Stadium, Shillong.
Ka kynhun haduh mynta kam pat shym la mad namrem, da kaba jop saw sien bad ïakhaid saw sien na ki phra sien ïakhun bad khur 16 poiñ na kine ki jingïakhun ba ladep.
