Ka jingthmu jong ka Sorkar MDA ba ïalam da ka National People’s Party ban pynkylla ka Syllabus na ka Meghalaya Board of School Education (MBoSE) sha ka National Council of Educational Research and Training (NCERT) lehse kan don ka jingwit bad lehse hato kane ka jingthmu babha jong ka Sorkar ka lah ban pulom?
Ha ka sngi Baar mynta ka taiew, ka kynhun ki nongdie kot kaba don kumba 30 ngut eiei kiba dei na kylleng kylleng ki District jong ka jylla, ki la pynpaw ïa ka jingsngewkhia halor ka jingthmu jong ka Sorkar ban pynkylla ïa ka Syllabus na ka MBoSE sha ka NCERT hadien ba ka Kynhun Myntri jong ka Sorkar Meghalaya ha ki bnai baladep ka la rai ban pynkylla noh ïa ka Syllabus jong ka MBoSE sha ka NCERT da kaba ai daw ba ki kot jong ka MBoSE kim ïahap kyrdan shuh bad ki jingpule bad kiwei pat ki bynta jong ka ri India.
Ka jingpynpaw jong ki nongdie kot ka long kaba shongnia, namarba ki la hap ban pynlut da ki klur tyngka. Lada ka Sorkar ka ïaid beit shakhmat ïa kane ka jingthmu, hato mano pat ban buria ïa ka bailutskan jong ki nongdie kot. Hato ka Sorkar ka la bishar bha neem bad ka la thew sawar bha neem shwa ban shim ïa kane ka rai. Ha ka jingshisha ka tnat Pule Puthi jong ka Sorkar Jylla ka ladei ban shim lang ïa ka jingsngew bad ka jingmut jong ki nongdie kot ruh shwa ban shim ïa kane ka rai kaba buh mynta ïa ki nongdie kot ha ka suhsat. La kin shong ruh jhieh, la kin ieng ruh tyngkhuh.
Lada kane ka jingshim rai jong ka Sorkar kan treikam noh mardor naduh ka Academic Year-2024, kan long ka jingduhnong ïa ki nongdie kot kiba ju im kamai jakpoh na kane ka kam bad ka jingdie ïa ki kot ka long beit thik tang ha ka por sdang skul, kam pher lada dei ba ki la ïateh soskular lypa bad ki skul lane ki shu die khutia beit kumba ju long.
Ka Sorkar mynta kan hap ban pyrkhat ruh ïa ka jingeh jong ki nongdie Kot namarba ka jingshim rai jong ka Sorkar ka long hakdak bad kyrkieh bha.
Kiba bun ki longing longsem ha kane ka jylla, tang shu mih kane ka rai jong ka Kynhun Myntri ki kmen haduhkatta katta ban ïogi ba ka lawei pule jong ki khun ki kti kan sa kylla dur namarba ka jingpyndonkam baroh shikatta ïa ki kot jong ka MBoSE ka buh jingeh bha ïa ki khynnah skul kiba angnud ban ïakhun ïa ki eksamin NEET, JEE bad kiwei kiwei ki Competitive Exams kiba long shabar jong ka jylla.
Haba peit nuksa ïa ki khynnah skul kiba pule ha ki skul JNV bad ha ki skul kiba pynrung ïa ki Syllabus jong ka Indian Certificate of Secondary Education (ICSE) bad ka Central Board of Secondary Education (CBSE) la shem ba ki kham tam shakhmat ha ki jingpule namarba ka Syllabus ka dei kaba kham ïar.
