Husiar paidbah haba rakhe ïa ka Easter Monday naba bun kiba lum pisa beaiñ na surok, kynnoh ka GSU

Shillong, Ïaïong 19: Ka Eastern Zone jong ka seng Garo Students’ Union (GSU) ka la sdang ban pynlong ïa ki jingai jingpynsngewthuh paidbah haba ïadei bad ka jingleit ban picnic ki nongshong shnong ha ka Easter Monday bad kiba rakhe ïa kane ka sngi bad ka la kyntu ruh ïa ki paidbah ban long kiba husiar naba bun kiba lum pisa beaiñ na ki kali.
Kane ka jingïalap ka thmu ban wanrah ïa ka shongsuk shongsaiñ bad ki jingleh sngewbha kiba don ki lad jingïada bad ha kajuh ka por ka pynpaw pat ïa ka jingsngewkhia ïa ka jinglum pisa beaiñ na ki khyrdop ha ki surok paidbah.
Ha kine ki snem ba la leit, ka jingrakhe ïa ka Easter Monday ha East Garo Hills ka la long kaba sngewsih kum ki jingjia takhuh kali, ka jingdih kiad haba ñiah kali bad ka jingngam jyllop, pyntip ka GSU ha ka kyrwoh khubor. Da kane ka jingïalap ka GSU ka la kyntu ïa ki paidbah ba kin rakhe da ka jingkitkhlieh, ban long kiba peitngor bad ban burom ïa ka aiñ.
Ka jingsngewkhia bha jong ka seng ka long ka jingkiew ka jinglum pisa beaiñ na ki kali kiba kit ïa ki tiar kum u kwai, ki synñiam, u sying bad kiwei ki jingri.
“Kine ki jinglum pisa beaiñ ba khlem ïohbor la leh ha ka kyrteng ki sengbhalang, ki Nokma council, ki bor municipal bad kiwei ki seng ba shukam. Ka GSU ka pynrem jur ïa kine jingleh bad ka pynkynmaw ïa ki paidbah ba kum kine ki kam ki long kum ki kam lute hapoh ka Section 384 jong ka Indian Penal Code, ka punishable criminal offence,” ong ka kyrwoh da kaba bynrap, “Kum kine ki jinglum pisa beaiñ na ki khyrdop lum khajna ym tang ba ka pynkhia ïa ki nongkit bad nongkhaii bad ka pynkiew ïa ka dor ka mur hapoh ki ïew ki hat, ha kaba khatduh kane ktah ïa ki paidbah khamtam kiba duk. Kaba kham sniew shuh shuh ka long ba kane ka pynshlur ïa ki samla ban kamai pisa da kaba suk.”
Kum shi bynta na kane ka jingïalap, na ka liang ka GSU kin leit ban jngoh ïa ki katto katne ki jaka kiba ju jia bha kine ki kam lum pisa beaiñ bad ban ïasyllok bad ki paidbah bad ban ai ka jingpynsngewthuh ïa ki. Kan don ruh ka jingpynlong ki jingïalang ïasyllok ban wad ki lad ki lynti halor ka aiñ, ka jingshim rai na ki paidbah.
Ka GSU ka la dep ruh ban aiti ïa ka shithi sha u Superintendent of Police ka East Garo Hills ha kaba ka la kyrpad ban pynshitom tyngeh pyrshah ïa kino kino ki riew shimet ne ki kynhun kiba pynthut bad ki lute ka pisa na ki kali. Ka union ka la kyrpad ruh ban pynneh ïa ka shongsuk shongsaiñ ha kane ka jingrakhe ïa ka Easter Monday.