Shillong, Jymmang 22: Ka Sorkar Jylla ka la rai ban pynkynriah noh ïa ki nongdie jingdie ne ki nongshong dukan kiba don harud ka surok bah Shillong-Dawki ba dang shu shna thymmai, haba kdew ba ka buh jingma ïa ki paidbah bad ki kali kiba ïaid ba ïeng.
ïa kane ka rai la shim ha ka jingïalang ba la pynïaid da ka Deputy Commissioner (Revenue) ka East Khasi Hills Kong RM Kurbah ha ka 15 tarik Jymmang.
ïa kane ka jingïalang la khot hadien ba u Manager (P), ka NHIDCL, PMU-Mylliem, u la pynpaw a ka jingsngewkhia halor ka jingdon kiba shong die jingdie ha bun jaka ki lynti ïaid (ROW) naduh Rilbong Point haduh 3 Mer Shiteng bad 7 Mer Upper Shillong.
U Manager ula pynpaw ruh ïa ka jingsngewkhia halor ka jingbuh ïa ka jaka pynieng kali ha Rilbong Point.
“Namar ba kane ka jingkyntur pud ha surok bah ka lah ban wanrah jingma kaba khraw ïa ki paidbah, ki nongdie jingdie kumjuh ruh ïa ka jingïaid ki kali, ha ka jingïalang la rai ba ki Ophisa ka tnad Pulit, ka PWD (Roads), NH Division Shillong bad ka NHIDCL ki dei ban ïatreilang ban pynkynriah ïa ki nongdie jingdie ha ka Sngi Thohdieng”.
Ban pyntreikam ïa katei ka hukum, la bthah ïa ka NHIDCL ban buh dak ha kine ki bynta jongka surok.
Ka Ophis Superintendent of Police (Traffic) kan buh ïa ki jingker ban pyrrking ïa ka jingïeng kali hapoh ka bynta ROW bad ban buh ïa ki pulit ha ka jaka.
“Ka jingïalang ka la rai ruh ba ka NHIDCL, PWD (Roads) NH Division, bad ki Pulit kin ïatreilang ban weng ïa ki nongdie jingdie hadien ba la dep ai jingtip sha baroh” ong ka kyrwoh.
Ka surok bah Shillong-Dawki ka dei ka surok kaba kongsan bad ki heh Sorkar ki la ban jur ba ka jingkyntur pud ka pynthut ïa ka ïaid ka ïeng ki kali bad ka buh jingma ïa ki nongleit nongwan.
