Nongstoiñ, Nohprah 12: Kawei ka skul kaba don sha ki thaiñ Ri Muliang kaba la tip kyrteng kum ka Kyrdum Govt LP School ka don tang iwei I nonghikai na ka bynta ki 95 ngut ki khynnah skul kiba naduh ka klas A haduh klas V.
Ïa kitei ki 95 ngut ki khynnah skul kiba don haduh 7 tylli ki klas la hikai tang da ka kong Risbiolin Lyngdoh marwei haduh 50 tam ki subject mynta la kumba 2 snem ei ei.
Katei ka nonghikai kaba dei ka Headmistress ha kajuh ka por kadei ruh kum ka Head teacher, peon, clerk bad chowkidar ruh kumjuh namar baroh ki kam ka hap ban khmih hi marwei la ha ki kam ophis ne kino kino.
Katei ka skul kaba dang hap hapoh ka West Khasi Hills District la seng ïa ka naduh u snem 1958 bad haba u nongthoh khubor u la leit ban khmih bniah la lap ba shibun kiei kiei kiba kynthup naduh ki tnum ïing ki Ben ki jingkhang bad ki kamra ki la sdang ban jot na ki katto katne ki bynta.
Haba ïoh pat ban ïakren bad ka kong Batkordor Nonglang kaba dei ka kmie jong ka Aijingsuk kaba pule ha katei hi ka skul kumjuh ruh bad ki katto katne ngut ki kmie ki kpa jong ki khynnah skul ki la ong ba ki sngewdiaw bad ki sngew duhnong shi katdei eh namar ïa ki khun jong ki la shu long kumba la shu pynbam tang shiteng kpoh bad ka long ka jingduhnong kaba khraw ïa ki khun jong ki hynrei haba thmu ban sei noh ruh ym kotbor ban phah sha kiwei pat ki skul namar ki jngai.
Ym tang katta hynrei ki nongshet Ja ha katei ka skul ruh ki ud ki nam da kaba ai daw bad ki la ong ba nalor ba ka tulop ka rit sa bad ka pynslem ban siew kumta ka pynshem jingeh ïa ki haba trei ïa katei ka kam, ong ka kong Sphuldaris Thongni bad ka kong Mellity Nonglang ki nongshet Ja ha katei ka skul.
