Hiar u Dr. Mukul Sangma sha Tyrso ban ïalap election ïa ka kyrtong ka TMC na Mawhati Constituency

Nongpoh, Rymphang 17: U Dr. Mukul Sangma kum u myntri barim ka jylla bad u nongïalam ka liang ka liang pyrshah mynta ka sngi u la hiar sha Tyrsoh ha ka jingïalang ïalap election ka party TMC na ka bynta ban ïalap election na ka bynta ka kyrtong jong ka party TMC ka Dr. Saralin Dorphang kaba dei ka kyrtong ba aireng na Mawhati Constituency.
Ha kane ka sngi ba la wan ïalap election da u Dr. Mukul Sangma kum u nongïalam bahakhmat ka party TMC la don ryngkat ruh u Dr. Fabian Lyngdoh, uba dei uba dei u State general Secretary ka party TMC bad ka Kong Saralin Dorphang kum ka kyrtong ka TMC na Mawhati Constituency.
Ha kane ka jingaïalang ïalap election ka kyrtong ka T MC kaba la long ha Madan Tyrso la wan ban sakhi lang ruh da kiba bun ki paidbah ka thaiñ kiba dei ki nongkyrshan jong ka kyrtong ka TMC na Mawhati Constiteuncy.
Ki mat bahakhmat ba la kren da ka Dr. Saralin kum ka kytong ka TMC ba lada ka wan ha ka bor ne ki paidbah ka Mawhati ki kloi ban pynjop ïa ka kum ka nongmihkhmat ki kynthup ïa ka jingangnud ban wan rah ïa ka C&RD Block ha Mawhati, ka Market Complex, ka Model School bad ruh ban kyntiew ïa ka thaiñ Tyrso-Umru halor ka jingbna nam jong ka jingwan kita ki sim Amur Falcon na shiliang duriaw.
Ka la pynpaw ruh kum ka Doctor ka hap ban shim ïa kane ka rai ban ïa khun na Mawhati ka long ban buddien ïa ki dienjat jong u kpa jong ka, uba ki paidbah ki la pynlong kum uta u nongmihkhmat ha ki snem ba la leit noh bad ruh ka thong kaba hakhmat ka long ban dang lur ïa kane ka Mawhati Constituency, kaba dan sah shrah ha baroh ki liang bad ban pynurlong ïa baroh ki jingdonkam jong ki paidbah ban kyntiew ïa ka roi ka par, ka ioh ka kot bad ka bha ka miat ka donkam ïa ka jingpynkup bor jong ki paidbah, ka la pynpaw sha ki paidbah.
Ha kane ka sngi, naduh u Dr. Mukul Sangma, u Dr. Fabian Lyngdoh ruh haba ïalap election na ka bynta ka kyrtong ka TMC Mawhati, ki la pan ka jingkyrshan kaba radbah na ki paidbah ka Mawhati ban kyrshan ïa ka party TMC na ka bynta ban wan rah ïa kata ka jingkylla hapoh katei ka Constituency bad ha ka jylla hi baroh kaewei.
U Dr. Mukul Sangma kum u myntri barim u la ther ruh halor ka jinghiar ka jylla ha kine ki san snem ba ki paidbah ki mad jingeh naduh ka jingkyrduh kam kyrduh jam ki khun samla, ka jinghiar ka ioh ka kot bad ka jingshah ktah ki paidbah ha baroh ki liang ha ka jingsynshar ka sorkar synrop ba la lamkhmat da ka NPP party.
Kum u nongïalam bahkhmat eh ka TMC ula ong ruh ba ka TMC ka don ka thong ban wan rah ka jingkylla ha kaba tang mynta ruh ka la kular ban ïarap T. 1000 kawei ka longkmie man la u bnai bad lada ki paidbah ki kloi lei ban pynjop ïa ka party lada ka party ka wan ha ka bor kan phai khmat kyrpang naduh ki samla khlem kam khlem jam, ki longkmie ba shah iehnoh bein, ki longing baduk ba kyrduh.
Shuh shuh, u la pynpaw ruh ba ki paidbah hi ki sakhi halor ka jingshah khnioit beiñ ki paidbah ha ka jylla ba ym don kata ka shongsuk shongsaiñ bad ka jingpyntreikam ïa ki skhim sorkar ruh kam long kaba khuid ba suba bad kum ki paidbah ki dei ban bishar bhiah khnang ba kin nym mat biang kumba ki la mat ha kine ki 5 snem ba la leit noh ha ka jingsynshar dor bor ka sorkar synrop ba la lamkhmat da ka NPP party, u la bynrap.