Nongstoiñ, Lber 16 : Ki nongïalam jong ka kynhun synrop jong ki ar tylli ki seng saiñ pyrthei kiba la rim tam ha ka jylla, kata ka Hill State People Democratic Party ba la ïalam da u bah K.P.Pangñiang MLA barom ka Rambrai Jyrngam u ba long ruh u president bad u secretary jong ka Regional Democratic Alliance, u bah Metbah Lyngdoh MLA ka Mairang president ka UDP u ba dei ruh u Chairman ka Regional Democratic Alliance, kaba dei ka kynhun synrop jong ki seng riewlum, u bah Renikton Lyngdoh Tongkhar MLA ka Mawkyrwat ryngkat u bah Robertjune Kharjahrin u ba dei u kyrtong ba baroh ar tylli ki party ki la mon lang ban pynïeng ha ka elekshon MP ka ban sa wan, hynin ka sngi ki la hiar sha ïew Langpih ban pynshai sha ki paitbah ïa ki mat ïaleh elekshon bad ban pynshai ruh ha kaba ïadei bad ka jing pynïeng lang jong ki ar party tang uwei u kyrtong.
La pynlong ïa ka jingïalang paitbah ha phyllaw jong ka Raidmynsaw Upper & Higher Secondary school, ha kaba la pynïaid da u bah K.P.Pangñiang president ka HSPDP. Ha ka jingïalang la ïadon lang ruh da ki rangbah shnong, ki nongkitkam jong ka HSPDP Rimuliang zone ki longkpa longkmie ki samla bad ki paitbah jong ka thaiñ.
Ha katei ka jingïalang ki nongkren ki la pynshai ba ka jingpynïeng tang uwei u kyrtong da ki ar tylli ki party, ka dei kaba ki la angnud la kham slem ba wanrah ïa ka jingïatylli hapdeng ki party riew lum. Namar lada ki party riew lum kin ïa ïeng pyrshah kawei ïa kawei pat kin ym poi shano shano, khamtam eh ha ka MP elekshon kaba na ka Shillong Parliamentary constituency kaba don tang uwei u kyrtong.
Nalor kata ki la ong ba lada ka UDP bad ka HSPDP kin pynïeng la u jong u jong u kyrtrong baroh ar tylli ki party kin shah rem bad ki ban jop kin dei beit da ki National Party. Shuh shuh ki la pynshai ba baroh shi katta ki paitbah ki la ju ong ba ki la I donkam ba ki party riewlum kin ïatylli. Ha kane ka kynti ki nongïalam jong ka HSPDP bad ka UDP ki la sngewthuh shai ba ka jingïatylli ka dei kaba donkam eh bad ki la shim ïa ka sien jam kaba nyngkong ban ïatylli lang.
Ki la kyntu ïa ki paitbah nongkyrshan jong ka HSPDP ba ha kane ka kynti ka shap jong u Sing kam don ha ka sngi thep vote, namar ba ki la ïa mynjur lang ban pynieng tang uwei u kyrtong bad ka shap kan long ka Bom.
U bah Robertjune Kharjahrin kyrtong MP jong ka RDA haba pynshai sha ki paitbah, u la ong ba lada ki paitbah kin ai ka jingkyrshan ba pura ban un jop ha kane ka elekshon ban wan, un ïasaid na ka bynta ki mat ki jura ba ka jaitbynriew ka angnud.
U la ong ruh ba kum u nongïalam barim jong ka HYC, u sngewthuh shai haduh katne ka jaitbynriew ka mad jingeh, namar ki nongmihkhmat sha ka Lok Sabha kiba la jop ha ki snem ba la dep kim shym la ang ïa ka shyntur ban kren ha ka Dorbar Parliament ha ka por kaba biang. Hynrei ki kren tang ym da ka Dorbar Parliament ka la jan kut bad ka sorkar kam don por shuh ban sngap ïa ka jingkren jong ki.
