Hiar jurip u Lat ïa ka Dawki Land Port bad ka ICP, pynsngew ki paidbah ïa kiba bun ki jingeh
Shillong, Jymmang 10: U Lat ka jylla u Phagu Chauhan mynta ka sngi ula leit ban jurip ïa ka thaiñ Dawki West Jaintia Hills kynthup ïa ka Dawki Land Port ba dang shu plie dang shen, kaba pynïaid da ka Land Port Authority of India (LPAI) lem bad iaka Integrated Check Post (ICP).
Ha kane ka sngi u Lat ka jylla ula ïakynduh ruh ïa ki ophisar ka Land Port Authority of India (LPAI), ki heh shipai BSF, ki ophisar ka tnat Customs, ki bor district naduh u Superintendent of Police, PD-DRDA, SDO (Civil) jong ka Amlarem bad Pynursla Civil Sub Divisions bad ïaki rangbah shnong ka thaiñ.
Ha kane ka sngi u Lat ka jylla ula ïoh sngew halor ka jingtreikam ka Integrated Check Post ha Dawki, ka jingtreikam ka tnat Customs bad Central Excise Department bad kumno la pyntreikam iaki skhim sorkar pdeng kum ka PMAY, MGNRERS, SSA, PM-POSHAN, National Health Mission, PMGSY da ki tnat sorkar jylla.
Naka liang u Superintendent of Police (SP) West Jaintia Hills ula ïathuh sha u Lat halor ka jinglong jingman hapoh ka district bad ka thaiñ baroh kawei bad ula ïakren ruh bad ki rangbah shnong jong kane ka thaiñ ban ïoh sngew halor ki rukom pyntreikam ïaki skhim hapoh ki shnong.
Naka liang ki rangbah shnong kila pynpaw sha u Lat ka jylla halor ka jingtlot ki Mobile Network hapoh ka thaiñ bad haka juh ka por kila pynsngew ka jingsngew khia halor ka jingsuki ka rukom pyntrei ïa ka surok Shillong-Dawki.
Nalor kane u Lat ka jylla ula leit jurip ruh ïa ka Indo- Bangladesh Maitri Dwar kaba don ha Tamabil Border Check Post bad ula ïakren bad ki ophisar ka tnat Bangladesh Border Guards. Ula sam ïa ki jait jingbam kum shi bynta ban wanrah shuh shuh ka jingïajan hapdeng kine artylli ki ri.
U Lat ula leit ruh ban jurip ïaka Border Out Post (BOP) jong ka 4th Battalion Border Security Force (BSF) ha Dawki bad naka liang u Pradeep Kumar, IPS, Inspector General of BSF HQ Shillong Frontier ula ïathuh halor ka jingtreikam ki shipai BSF ban pynkhlaiñ ïaki lad jingïada ha ki thaiñ khappud.
Ha kane ka sngi u Lat ula leit shangkai pyngad ruh shaka wah Umngot River haka jingdon lang u Commissioner bad Secretary u Dr. B. D. R. Tiwari lem bad kiwei kiwei de.