Jowai, Risaw 17: U Myntri Rangbah jong ka sorkar jylla u Conrad K. Sangma haka jingwan hiar jong u mynta ka sngi ha Jowai ula leit jurip kynsan ïa ka jaka pule jong ka Kiang Nangbah Govt. College Jowai bad kumjuh ïa ka Jowai Civil Hospital Ialong West Jaiñtia Hills District.
Kane ka jingleit hiar jurip u Myntri Rangbah ka jylla ka long hadein ka jingïamir jingmut jong ka kynhun myntri ha kine ki sngi ba ka dep, haba leit sha kino kino ki jaka ki dei ban leit jurip kyrpang khamtam ïa ki jaka pule bad ïa ki jaka sumar jong ka sorkar.
Haba kren sha ki lad pathai khubor na ka liang u myntri rangbah ula ong kane ka jingleit ïakynduh ïa ki bor pynïaid jong ka KNGC bad ka Jowai Civil Hospital la ïoh lad ban ïakren halor ki jingeh bad ki jingduna kaba ki ïa kynduh.
Ula pynsngew kum ki bor pynïaid jong kitei ki jaka haba don kino kino ki jingeh ki dei ban ïashong lang ha ryngkat u MLA ka thaiñ lem bad ki ophisar naka tnad pule puthi bad na ka koit ka khiah na ka bynta ban pynkhreh ïa ka report ban rah sha ka sorkar.
Kumba long mynta ka sorkar hapoh ka jingïalam jong u kum u Myntri Rangbah kala pyrshang katba lah ban pynbha nyngkong ïa kine ki ar bynta kata ka pule puthi na ka bynta ki samla pule bad ka jingkoit jingkhiah jong kiba bun ba lang.
Shuh shuh ula pynsngew kino kino ki jingdonkam hapoh ka District kum u MLA ka thaiñ un wanrah ïa ka report bad ban pynsngew sha u kum u Myntri Rangbah khnang ban un ïoh peitbniah bad ban leh ïa kaba donkam.
