Ka long shisha ka khubor kaba sngew don jingkyrmen ban iohi ba ka Meghalaya Pradesh Congress Committee (MPCC) dang shen ka la kyntu ïa u Myntri Rangbah ka Jylla Conrad K Sangma ba un tuklar ha ka ban khang noh ïa ki website phlim khlemakor khnang ban lah tehlakam ïa ki kam bymman pyrshah ïa ki khynnah hapoh ka Jylla khamtam ha kine ki por ba la sdang kynrei ki kam sniew. La ïohi ba lyngba, ka shithi ba la phah sha u Myntri Rangbah u Conrad Sangma, ka President ka MPCC ka kong Joplyn Scott Shylla ka la pynpaw ïa ka jingsngewkhia kaba jur halor ka jingnang ïai kiew ki kam thombor ïa ki kynthei khamtam ki khynnah ha kylleng ka Jylla ha kine ki por. Ka la ong, “Ki dei ki jingjia kiba la ktah bad kiba la pynkhihwin ïa ka jingsngew jong ka imlang sahlang bad kyrmen ba ka jingtuklar ba mardor ka long kaba donkam ha ka kyrdan ki nongthaw aiñ ban leh eiei ïa kawei na ki daw tynrai.”
La ban pynkynmaw ba ha kaine ki khyndiat snem, u Acharya Vijayratna Sunder Suri, u wei na ki lyngdoh jong ka niam Jain na Mumbai u la phah ia ka jingkyrpad sha ka iing Dorbar ‘Rajya Sabha’ jong ka ri India na ka bynta ban teh lakam ia ki jingpyni ia ki kam awria ne pornography, da kaba pyntreikam ia ka IT Act 2000. Ia kane ka jingkyrpad la soi ruh da u Vijay Darda uba dang iabun kam bha ha ka bamsap Coalgate Scam. Na ka liang jong ka Rajya Sabha Committee halor kaba iadei bad katei ka jingkyrpad ba ka la khot ia ka jingai jingmut na ki paidbah, la ka dei ne em ban niew ba ka jingpeit ia ki jingpyni ia ki kam awria ka long kaba beain. Ia katei ka jingkyrpad la soi ruh da ka Pratibha Naithani, ka Professor na Mumbai kaba iadon bynta bha ha kaba iakhih halor ki kam lyngkar kiba la ioh jaka ha ka kyrteng jong ‘ka hok jong ki kynthei’. Hato ka India ka lah mo ban teh lakam ia kitei ki jingyni awria bad khamtam ki pornsite hapoh ka ri?
Ia kum kitei ki jingpyni ia ki kam awria lah ban ioh lyngba ki kot ne Magazine, ki Computer lyngba ka Internet kumjuh ruh ha ki Mobile bad kiwei pat ki kor peit dur. Kum ki nongshong jong ka ri India ki nong Meghalaya ruh ki don ia ka hok ban kren ei ei halor katei ka phang. Haba ia nujor bad ka pyrthei kaba la iaid shakhmat lehse ka jylla Meghalaya khamtam ka jaidbynriew Khasi ka dang long kawei ka jaidbynriew kaba danglung bad dang sdang ioh sngew bad iohi. Ha kiwei pat ki jylla ba heh jong ka ri India la lah ban pdiang bad ban niew ia ki kam awria ba kadei kawei na ka hok ki kam kamai jakpoh ne right to livelihood’, dei na kata ka daw ba ki sa don kita ki Red light area bad ba la aibor ia ki thei nuti ban don da ka laisen ban leh ia kum katei ka kam. Ha ka jingshisha ka imlang sahlang kam lah ban pdiang ia kum kitei ki kam, hynrei ki la don ki briew./kynhun kiba kyrshan bad kiba iasnohkti la dawa ba ka sorkar ka dei ban ithuh bad niew ba kadei ka hok jong ki.
Ha ki snem kiba ka Internet ka sdang ban rung jubor la kynmaw ba kiba bun ki longkmie wat ha America ki pyrshah jur namar ba ki tip bad iohi ia ki jingma kiba lah ban ktah ia ka imlang sahlang. Kat kum ka kaiphot la iathuh ruh ba ha America ka la don ka jingieh lyngkar ia ki khun ki kti namar ba ki don ki kmie ki kpa kiba la kyrni noh ha kitei ki kam awria ba la tip kum ki Cyber Pornography bad la khot ia ki ki ‘Fatherless America bad Motherless America’. Kane ka jingsniew ka la kylla long kawei na ki lad ba pynbyrngia ia kiba bun kiba ngop ha ka. U Kamlesh Vaswani uwei na kiba la ujor ia ka public interest litigation sha ka Supreme Court u la ban jur ba dei ban khang syndon ia kiba kum ki kam awria (porn), bad u la ong ba ka long kham sniew ia ka jingpyniap pathar jong u Hitlar (Nazi holocaust) ne u bom nuclear. Ryngkat bad u acharya u vaswani ula kynnoh ba kitei ki porn ki long ka daw jong ka jingshah leh beijot bad thombor ia ki kynthei bad khynnah.
Kum ka jylla kaba la tip kum ka christian state ka Meghalaya ka dei ban iaid shaphrang ban phikir bad peitngor na ka bynta ka burom ka akor. Kum ki briew kiba ieit ia ka burom akor ym dei ban randien na kaba pyrshang ban wanrah ïa ka jingbha. Ka ri ka donkam ia ka ain kaba ïada ïa la hok jong ka akor ka burom bad ngi donkam ban sngewthuh ba ki kam khlem akor, kam awria ki dei ki jingteh mraw kiba sniew ha ka imlang sahlang kaba ngin kwah ba kan jia ha ki iing jong ngi.
