Hato, kylla ‘langknia ki khynnah ba ïaleh SSLC Exam, 2024 ha ka subject Social Sciences?

Ka la mih ka khubor marsien dep ka Exam SSLC ba bun ki khynnah kiba ïaleh ïa ka SSLC Exam mynta u snem 2024 ki la shah shet pluk ha ka subject Social Sciences kaba kynthup ïa ka History bad Geography mar 23 mark, ka Civics bad Economics pat mar 17 marks nalor ka 20 marks ka Internal Marks bad 4 marks pat ka Map, katkum ka Blue Print ba la ai copy da ka MBOSE sha baroh ki skul ha u snem 2018.
Hashwa jong u snem 2018, kata, naduh ka snem 2008, ka MBOSE ka la phiah ïa ki jingkylli la ki jong ki jong ki subject ba ki khynnah ki dei ban jubab, kata, ki khynnah kidei ban jubab beit ïa ka History, Civics kiba hab ha ka Social Sciences I bad ka Geography bad Economics kiba hab ha ka Social Sciences II kin thoh la ka jong ka jong ka subject.
Dei ha ka snem 2018 ba ka MBOSE ka la pynkylla noh ba kin don noh ki jingkylli ban shu jied ki khynnah ïa kiba dei (right answers) ne Multiple Choice Questions (MCQ) kiba kit shi mark (1 mark) kawei ka jingkylli bad ki Short Answer (SA) kiba kit 2 marks kawei ka jingkylli. Kitei ki jingkylli baroh 2 jait dei ban khleh lang (mixed) ïa baroh 4 subject bad ki khynnah kidei ban jied ne jubab tang 12 tylli na kawei-pa-kawei na kitei ki jingkylli.
Hynrei ki Long Answer (LA) pat ki khynnah kidei ban jubab beit (mandatory) la ka jong ka jong ka subject, kata, mar 3 tylli na ka History bad Geography bad mar 2 tylli pat na ka Civics bad Economics. Kane ka rukom leh kan kham pynsuk ne ïarap ïa ki khynnah ba kin ïoh jied khnang ba ki lah ban kham pass bha. Haba phai pat sha jingkylli jong ka Social Sciences jong mynta u snem 2024, ki jingkylli na ka Social Science I (History bad Civics) u/ka nongset jingkylli um/kam da pynpher palat ne leh stad eh haduh katta katta lait noh katto katne. Hynrei ïa ka Social Science II (Geography bad Economics) u/ka la wanrah ka rukom set jingkylli kaba ïapher bak-ly-bak na ka rukom set jingkylli kaba mynshwa (existing system). U/Ka la ïaid lait ïa ka nuksa jingkylli (sample questions) jong ka MBOSE ba dei ban kham bun ki jingkylli ban set na ka kot pule (Text book) jong ki khynnah bad tang khyndiat eh ki jingkylli dei ban pynpher tang ban ithuh ïa ki khynnah ba proh jabieng (talented students). Lada shu pynpher lut ïa ki jingkylli, kata, ki set tang ïa ki proh jabieng khlem pyrkhat shuh ïa ki khynnah ba shu pdeng (average students) bad ki khynnah ba kham duna (below average students).
Ha kamra class, kin don eh 10/15 pc ki proh jabieng katba 90/80 pc kidei ki average bad below average students. Kidei kine keiñ kiba kylla ‘langknia namar kim lah ban thoh ne jubab hi na la ka jingstad lade (common sense). Wat lada set jingkylli thik na copy ne na ka kot pule jong ki ruh, bun kim lah bad bun kiba fail. Katno tam lei lei lada pynpher ïa ki jingkylli na kiba la ai. Hynrei, kiba kham shah ktah eh ha ka Social Sciences mynta u snem 2024 kidei ki khynnah bym leit skul (private candidates) kiba ju shaniah ïa ki jingkylli barim (previous question papers) bad ki shaniah ruh ha ki help book kiba ki thied na ïew na hat (bazar notes). Kine kin long ki ‘langknia ba shyrkhei (worst affected victims) ïa ka subject Social Science mynta u snem 2024.
Nangne shakhmat, lada ka MBOSE ka kwah ban pynkylla ïa ki rukom set jingkylli, ka dei ban ai jingtip (notify) sha baroh ki skul khnang ba kin tip ban hikai ïa ki khynnah ha classroom katkum kata ka model jong ka rukom set jingkylli, ym ban shu set katba mon katba kwah. Bun ki nonghikai ki dang hikai da ka rukom set jingkylli kaba rim (existing system) ha une u snem 2023 ba la dep namar ym pat don satia kano kano ka jingpyntip thymmai (new notification) ka ban pynïap noh (supercede) ïa ka system kaba ju leh. Lada ka MBOSE ka ïai mlien ban ïaid lait ïa ki kyndon (guidelines/criteria) ba ka la bthah hi, kata, kan kylla long ka nongpynïap ba jar jar (silence killers) namar kin nang jur shuh shuh ka jingpep skul (drop outs) shiteng por jong ki khynnah.
Nalor ba ka Meghalaya ka la poi lypa sha trai (bottom) ha ka liang ka thoh ka pule ha ri India, nangne shakhmat kan sa kham hiar shuh shuh wat ïa ka Bihar kaba dei ha state kaba poi sha trai duh. Ym tang kumta, hynrei nangne shakhmat, bun ki skul ha sor bad wat ha nongkyndong ruh ki ban leit pynïasnoh (affiliate) noh sha ka Central Board kum ka CBSE/ICSE, etc, kumba pynïasnoh lem kiwei ki skul kum ka Pine Mount School, BK Bajoria, Army school nalor bun bah ki central school kiba don ha state jong ngi.
Dei hangta keiñ ba ka lah ban ktah matïong ïa ka burom ka ijot (prestige/credibility) jong ka MBOSE hakhmat ki ri India hi baroh kawei.