Shillong, Lber 18: Imat ha ri India hi haba ïakren ïa ka elekshon, yn nym don kawei ruh ka jingdonkam kaban kham tam ïa ka bad ka tam ruh ka jingdonkam wat ïa ka pule puthi ruh.
Ka daw ba la ong kumne, kadei namar ba la ïohi ba hadien ba ka Election Commission jong ka ri India, ki Nonghikai skul ki la ïa bunkam ban mareh sha ki ophis DC, SDO Civil bad shawei shawei na ka bynta ban pyndep ïa ki kam elekshon. Kiba bun ki la hap ban iehnoh noh ïa ki kam hikai jong ki bad ban wan beh shuwa ïa ki kam kiba ïadei bad ka elekshon. “Mynta ka sngi, ngim shym la ïoh lad ban peit shuh ïa ki khynnah skul, hynrei la hap ban wan beh noh shuwa na ka bynta ki kam elekshon”, la ong katto katne ki nonghikai kiba la ïakynduh ïa u nongthoh khubor ha ophis DC.
Kane ka jingngat duty elekshon ki Nonghikai khlem pep kan ktah ïa ki khynnah skul, namar ba la ïohi ba ka jingthep vote ha Meghalaya na ka bynta ka Lok Sabha kan long haduh ka 19 tarik u ïaïong mynta ka snem, kaba mut sa shi bnai nangne. Ki nonghikai ki la ïathuh ba kim tip katno sien kin hap ban leit ban attend ïa ki election duty la ka long ki training ne kiwei pat ki jingdonkam. Hynrei shisien hi ba ki la leit ki la duh beit ïa ka jinghikai ha skul.
Ki don shi kynhun ki nonghikai kiba na kawei ka skul ruh ki la ïathuh ba ki la ngap election duty lut baroh na kajuh ka skul, lait noh tang i BLO. Haba u nongthoh khubor u la kylli, kumno pat ki leh ïa ki khynnah skul, ki la ïathuh ba ki la hap ban shu ai shuti beit namar kumno kin phah wan ïa ki khynnah skul haba ym don nonghikai ha skul.
La ïathuh ruh ba ki nonghikai kiba ngat duty elekshon kim dei tang ki nonghikai na ki skul sorkar, hynrei ki nonghikai skul SSA, nonghikai Adhoc ruh ki ngat lang bad ki bym ngat duty imat ki lah ban dei tang ki nonghikai skul Private lane ki skul ki bym pat ïoh kino kino ki jingïarap na ka sorkar.
Haba la ïoh ban ïakren bad ki kmie ki kpa ki la pynpaw ka jingsngewkhia halor kane ka jingngat election duty jong ki nonghikai namar kan ktah shibun ïa ki khynnah skul. Tangba ki la pynpaw pat ba kin nym lah ban leh eiei na ka liang jong ki, katba ka sorkar ne ki bor pynïaid elekshon kim lah ban pynkiar ïa ki nonghikai na ki kam elekshon. Namar naduh mynshuwa ki la ïa pynpaw ka jingpyrshah ïa kane ka jingngat election duty ki nonghikai, hynrei kim lah ban leh eiei pat namar man ba long elekshon ki nonghikai ki hap leit duty beit bad kata ruh ym dei tang shi sngi arsngi hynrei bun sngi.
