Ka Them Metor ka jaka ba la ithuh kum ka Slum bah jong ka nongbah Shillong, ka dei ka jaka kaba buhai shnong da ki paid Harrijan kiba trei kum ki nongsar surok, ki nongleit lum jakhlia na ki iingbriew bad ter ter naduh ka por jong ka jingsynshar ka Sorkar Bilat. Hynrei hadien ka jinglaitluid jong ka Ri India bad ka jingïoh ka Meghalaya ïa la ka jong ka Jylla, ka Shillong Municipal Board (SMB) ka la shimwai ïa kane ka jaka ban pynshongshnong tang ïa la ki jong ni Nongtrei haba ithuh ruh ïa kiwei kiwei kum ki nongshongshnong ba be-aiñ.
Ka Sorkar naduh ki snem 1980 ter ter, ka la ithuh ïa ka Them Ïew Mawlong kum ka Slum Colony ba be-aiñ (illegal slum colony) bad ka la pynmih ruh ïa ka hukum ban kyndang ïa ki briew ba shong be-aiñ kaba la tip kum ka ‘The Meghalaya Public Premises (Eviction of Unauthorised Occupants) Act, 1980’ hynrei ïa kane ka hukum la pynsangeh da ka Iingkashari Guwahati High Court ha u snem 1986 da ka jingleit mudui jong ki Harijan kiba ieng pyrshah ïa ki bor sorkar.
Ka Them Ïew Mawlong ka dei ka ishu kaba la ïakhih da ki trai ri trai muluk ban weng noh na Them Ïew Mawlong naduh ki snem 1970 ter ter haba kynnoh ruh ba kane ka jaka ka la kylla long ka ktem ki riew sniew, ki nonglute, ki nongtuh nongthiem, ki nongleh bymman bad ki briew kiba pyndik ïa ka leit ka wan, ka khaii ka pateng bad ka kamai jakpoh jong ki babun balang khamtam ki paid Khasi kiba shah thombor na ka por sha ka por. Hynrei ka jingïakhih jong u snem 2018 ka dei kaba la jur thikna bad kane ka jingïakhih ka la pynkylla madan thma ïa ka thaiñ Motphran bad ki shnong ba marjan namar ka jingshah thombor ki paid Khasi ha ki Harijan ka Them Metor.
Kane ka jingïakhih ka la pynkhie im ïa ka mynsiem ieid ri, ieid jaidbynriew jong ki Khun ka Bri u Hynñiewtrep bad kane ka mynsiem ieid ri ka la paw shai kdar ha ki samla shynrang bad kynthei kiba la mih paidbah ban ïakhun pyrshah ïa ka jingshah thombor, jingshah iuhroit bad jingshah leh kheiñpoh kum ka jaidbynriew hakhmat kiwei pat ki jaidbynriew heh paid. Ka mynsiem ba shynrang bad ba satar jong ki khun Khasi ka dei ruh ka dak ban pyni sha ki bor synshar ba kim dei shuh ban shu leh khun jakai ïa u paidbah, ym dei shuh ka por ban shu ïa pynthame da ki buit bapher bapher hynrei ban pyni beit da ka kam katkum ka jingkwah u paidbah .
Ka Sorkar Jylla ba la synshar da ka Meghalaya Democratic Alliance (MDA-I) bad mynta ka kynti ka MDA-II ka la shimkhia bha ïa kane ka jingdawa u paidbah da kaba thung ïa ka High Level Committee (HLC) ban wad ïa ka lad ki lynti ban dup lah ban pynkynriah noh ïa ki briew kiba sah be-aiñ Them Ïew Mawlong. Da ki jingai jingmut jong kane ka Committee, ka Sorkar ka la thied duh syndon ïa ka jaka ha Them Metor na ka Hima Mylliem ha ka dor ba T. 2 klur bad ka la pynïaid shakhmat ïa ka kam kaba ïadei bad ka jingpynkynriah ïa ki nongtrei ka Shillong Municipal Board (SMB) bad jong kiwei kiwei pat ki tnad Sorkar kiba sah ha kane ka jaka.
Ki trai shnong ka jylla ki ap mynta sa tang lano ba ka Sorkar kan pynkynriah noh ïa la ki jong ki nongtrei na Them Ïew Mawlong bad ban kyndang ïa ki nongshong be-aiñ na ka jaka Sorkar katkum ka “The Meghalaya Public Premises (Eviction of Unauthorised Occupants) Act, 1980” kaba dei ka aiñ ban kyndang ïa ki nongshong shnong be-aiñ ha ki jaka Sorkar.
Dang shen, ka Ingbishar Meghalaya High Court ka la thalaiñ tyngeh ïa ka Harijan Panchayat Committee (HPC) kaba la leh shalak bad leh bym hok (playing fast and losse) ïa ka Sorkar Jylla bad ïa ka Iingkashari ha kaba ïadei bad ka jingpynkynriah ïa ki briew kiba sah na Them Ïewmawlong.
Ka Ingbishar ka la hukum ïa ka Sorkar ba ka dei ban pynstet noh mardor ïa kane ka kam da kaba shim ïa ki sien jam kiba ïahap bad ka kam bad ban pynkloi noh ban pynkut ïa kane ka kam kham kloi kat kaba lah.
Ka aiñ ka dei ka aiñ bad kam ju don satia ka jingsngew isynei ne sngew sangsot ïa ki nongpynkheiñ aiñ. Ki nongshongshnong kiba burom ïa ka aiñ jong ka Sorkar ki don da ki lak ngut kiba khlem iing khlem sem, khlem ki jaka puta, hato mano ba don hok ban ïoh jaka ei na ka Sorkar?
Baroh ki khmat mynta ki phai sha ka Sorkar Meghalaya Democratic Alliance ba kumno ban leh bad kaei ka sienjam ba kan shim halor kane ka kam ban law syndon shi junom ïa ki sohkyrdot kiba la jyrthiaw da ki phew phew snem.
