Nongstoiñ, Jymmang, 04: Naduh ki bnai ba la dep ka sorkar ka la dep mang pisa na ka skhim Pradhan Mantri Gramsadak Yojana, na ka bynta ban pynbha bad siang rong ïa ka surok kaba san kilomitar na Mawlangsu shaduh ka shnong Phodumbah, hynrei haduh mynta ym shym pat la sdang satia ban pyntrei.
U bah Kharlesborn Nongbri haba ïakren bad u nongthoh khubor, u la ong ba ki paitbah jong ki shiphew tylli ki shnong kiba don ha katei ka thaiñ, ki la angnud eh ba ka sorkar ka dei ban pynkloi noh ha kaba pyntrei ïa katei ka surok, khnang ba ki paitbah jong katei ka thaiñ kin lait na ki jingeh ha ka leit ka wan khamtam eh ba la wan ka aïom slap.
U bah Nongbri u la ong ruh ba u la ïoh jingtip ba ka sorkar ka la dep mang pisa ruh, na ka bynta ban pynbha ïa ka bynta ba dang sah jong katei ka surok, na Phodumbah sha Mawthungmarwei kaba jngai kuma hynñiew kilomitar. U la ong ruh ba ki paitbah jong katei ka thaiñ ki la kyrpad jur ïa ka sorkar, ba ka dei ban bthah ïa ki kontraktor kiba ïoh jingtrei ha baroh shilynter jong katei ka surok, ba kin sdang ban pyntrei ha ka juh ka por khnang ba ka leit ka wan kan ym thut.
Kum ban pynkynmaw ba katei ka surok na Mawthungmarwei shaduh Mawlangsu kaba jngai kumba 12 kilomitar, ka dei ka surok kaba la shna la slem bah. Hynrei haduh mynta u snem ba ka sorkar ka dang mang pisa na ka bynta ban pynbha bad siang rong.
Katei ka surok ka dei kaba donkam haduh katta katta, namar ba ki shnong kiba don ha katei ka thaiñ naduh Mawlangsu, Nginïong, Nongbodum, Domkohmen, Phodumbah, Mawmluh bad kiwei kiwei, ki dei ki shnong kiba hap ha ka Rambrai constituency kaba don ruh ïa ka Block ophis ha Rambrai.
Hynrei, na ka jingsniew jong ka surok haba ki leit don kam ki hap ban ïaid haduh Tyllang, Umlieh Nongstoiñ kaba ka jingjngai ka la poi ym duna ïa ka 54 kilomitar. Lada ka surok na Mawlangsu haduh Mawthungmarwei ka la bit la biang, ka jingjngai ka long tang kumba 13 kilomitar haduh Rambrai.
Nalor kata ki paitbah nongshong shnong ha katei ka thaiñ, ki dei kiba im da ka rep ka riang bad lada ka surok ka la bit la biang, ki lah ban pynpoi ïa ki mar rep jong ki sha Rambrai da kaba suk bad kan long ka jingmyntoi kaba khraw ka ban kyntiew ïa ka ïoh ka kot bad ka kamai kajih jong ki.
