Shillong, Nailar 27: U Symbud Myntri Rangbah ka jylla uba khmih ïa ka Tnat ki Kam Pohïing u Bah Prestone Tynsong ha ka sngi baar u la ong ba ka sorkar kan sa ïakynduh bad ka Harijan Panchayat Committee (HPC) hapoh kane ka taïew naba ki la pan por ban jubab ïa ka jingtyrwa ban pynkynriah noh ïa ki 342 tylli ki longïing napoh ka Them Ïew Mawlong.
“Ngin sa ïa shong hapoh kane ka taïew hapdeng jong ngi bad ngin sa shim ka rai halor kane ka kam,” ong u Bah Tynsong sha ki lad pathai khubor.
Haba kylli halor ka rai jong ka sorkar ba kam dei shuh ban don ka jingïakren hadien jong ka 15 sngi, u Symbud Myntri Rangbah u la ong, “Kadei kaba shisha ngi la leh ïa kane ban shim ïa ka rai hynrei sa shisien pat ngi la ïoh ka jingkyrpad na ka liang ka HPC ba ki kwah sa kawei ka jingïalang. Kumba long haduh mynta ngam lah ban kren palat halor kane namar kumba ka long mynta nga donkam ban khot ka jingïalang bad ka tnat ha shwa ban shim ïa ka rai.”
Lah ban ong ba ha ka sngi Nyngkong ka HPC ka la kyrpad ïa ka sorkar jylla ban pynjlan biang ïa ka por ha shwa ban jubab ïa ka blueprint na ka bynta ban pynkynriah ïa ki 342 tylli ki longïing napoh ka Them Ïew Mawlong.
Kane ka la wan hadien ba ka jingai por jong ka sorkar kaba long 15 sngi ïa ka HPC ka la kut noh ha ka sngi Nyngkong.
Ha ka kyrwoh khubor na ka liang u Secretary ka HPC u Gurjit Singh u la ong, “Hadien jong ka jingïalang kaba dangshen ha kaba u Symbud Myntri Rangbah u la kyntu ïa ka Committee ban shim noh ïa ka rai kaba khatduh hapoh ki 2 taïew, ka HPC ka la ong ba kane ka jingai por ka la long kaba lyngkot palat na ka bynta jong ki ban ïasyllok bad ki jaitbynriew Sikh.”
“Ngi thmu ban ïasyllok bad Jathedar of Sri Akal Takht Sahib, ka Shiromani Gurdwara Prabandhak Committee ha Amritsar, ka Delhi Sikh Gurdwara Management Committee, bad kiwei ki seng kiba heh bad ki nongïalam. Ka jingai jingmut jong ki ka long kaba kongsan bha,” ong u Singh.
“Ka shithi ka ai jingmut ruh ba halor kine ki nongrim ka Harijan Panchayat Committee ka kyrpad ba ka jingïalang ka ban long hadien kadei ban long ha shwa ban kut u bnai Nailur bad ha kane ka por yn sa lah ban jubab bha halor kane ka kam,” u la ong.
Na ka liang u Symbud Myntri Rangbah ka jylla uba khmih ïa ka tnat Pynroi Sor u Bah Sniawbhalang Dhar u la ong ba lada ka HPC ka kyntait ïa ka blueprint, ka sorkar kan hap ban leit kiew ïinglieh ïingsaw ne sha ïing kashari.
U la ong ba ka shong ha ka HPC ban rai khlem da pynslem shuh.
