Shillong, Nailar 27: U Bah Prestone Tynsong, Symbud Myntri Rangbah ka jylla, u la ïathuh ha ïingdorbar Thawaiñ mynta ka sngi ba kiti kiba ju im da kaba tih maw bad tih shyiap lada kim pan permission ne shim laisen na ka sorkar kim nym lah satia ban trei ïa kane ka kam, wat lada makna ka jingtih kaba la ju don ne ka rukom tih kaba don haduh ki por mynshuwa.
U Bah Tynsong, u la ïathuh ïa kane haba jubab ïa ka Zero Hour Notice ba la wanrah da u MLA ka South Shillong, u Bah Sanbor Shullai. U Bah Shullai u la ong ba katkum ba la mih khubor ka Notice ba la ai da ka tnad Forest ka la ktah shibun ïa ki nongtih maw tih shyiap bad ka la ktah ruh ïa kamai kajih bad ka ïoh ka kot jong ki, Kumta u la kyntu ïa ka sorkar ba kan tuklar ban leh eiei halor kane.
Na ka liang u Symbud Myntri u la pynshai shuh shuh ba ki rai bad ki jingbthah ym tang jong ka High Court of Meghalaya, hynrei jong ka Supreme Court kim shab ïa ka sorkar ba kan shu ailad ban tih katba mon ïa kine ki marpoh khyndew kiba rit ne kita ki minor mineral, hynrei ka sorkar ka hap ban shna ki kyndon bapher bapher ban teh lakam ïa ka jingtih pathar ïa kine ki marpoh khyndew wat lada kidei kiba pyndonkam ha kaba shna ïing shna sem ruh.
Ka daw ka long ba ki ïingbishar ki la kdew ba ka ktah ïa ka mei mariang bad namar ba ki la don ki jingujor, wat na shabar jylla ruh, ki ïingbishar ki la btah ban shna da ki kyndon.
Kumta u la ong ba ka long kaba donkam ba ki kiba trei ha kine ki kam kidei ban rejistar ïalade bad ka sorkar bad ban ïoh ïa ki kot ki sla kiba biang, khnan ba kin ïoh lad ban trei ïa kane ka kam.
