10 tylli ki Rehab Centre, la lah ban ïakhun 20% ïa u Drok, ong u Bah Paul

Shillong, Nailar 27: Ka ïingdorbar Thawaiñ mynta ka sngi ka la pyllut por palat shiteng kynta ban ïakren haloer ka jingeh ba ka jylla ka mad na ka jingjyllei u drok.
Kane ka long katkum ki jingkylli na ki dkhot ka liang pyrshah bad ka jingjubab na u Myntri ka tnad Social Welfare, u Bah Paul Lyngdoh.
Haba jubab ïa ki jingkylli na ki dkhot ka Liang Pyrshah, u Bah Paul, u la ïathuh ba ha jylla ki don shiphew tylli ki Rehabilitation Centre bad kine baroh ki don tang ha East Khasi Hills District. Na ka liang ka sorkar ka la ju kyrshan lang ïa kine ki Centre ha ki rukom bapher bapher. Ha kajuh ka por u Myntri u la ïathuh ba ka sorkar ka la pynkhreh ban ban buh ïa ki Rehab Centre ha baroh ki Headquarter jong ki District haka jylla.
Halor ki jingkylli ba la wanrah da u Bah Ardent Miller Basaïawmoit, MLA jong ka Nongkrem halor ka jingïoh jingïarap na ka sorkar pdeng ban ïakhun pyrshah ïa u drok, u Bah Paul u la ïathuh ba haduh mynta ka sorkar ka dang ioh dang kumba shi lak tam ka jingïarap, hynrei lyngba ka DREAM Project, ha kaba la mang ka pisa kaba 50 Klur tyngka ban pyllut ha kine ki san snem ban wan da kaba sdang shuwa da ka nang tyngka kaba 5 Klur tyngka.
Hynrei u Bah Ardent u la ïathuh ba kiwei pat ki jylla, kum ka Manipur ka ioh palat 6 ne 7 Klur tyngka na ka bynta ban ïakhun ïa u drok. U Bah Ardent u la kylli hato ka sorkar jylla ka la pan ne tyrwa ne em ban dang ïoh shuh ka jingïarap kaba kham heh kum kiwei ki jylla. U Bah Paul u la ïathuh ba namar ba kadei ka sorkar thymmai ha Delhi, ka sorkar kan sa leit ban ïakren biang bad ki bor sorkar pdeng.
U Bah Brighstarwell Marbañiang, u la iathuh ba ha Tripura, ka sorkar ka la mang palat 100 klur tyngka ban shna ïa ka Rehabilitation Centre bad ha ki District Headquarter pat palat 20 Klur tyngka. Kumta ka jingmang kaba tang 50 Klur na ka bynta ki san snem ka long kaba rit palat bad kam ïahap satia bad ka jingdon ki briew kiba dih drok kaba long kumba 3 lak ngut.
Ha kaba ïadei bad ka jingkam ka sorkar lyngba ka tnad Social Welfare ba ka jingïakhun pyrshah ïa u drok haduh mynta la lah ban jop kumba 20%. Na ka liang u MLA ka Nongkrem u la ong ba kaei ka rukom ba ka sorkar ka pyndonkam ban ïoh ïa kane ka jingkheiñ. U Myntri, u la ïathuh ba dei hadien ba la lum ïa ki jingkheiñ kiba bun lyngba ki statistics, ki jingsumar bad ki jingtreikam la shem ba ka jingïakhun pytshah ïa u drok ka jingjop ka la long kumba 20%.
Halor ka jingkylli jong u MLA ka North Shillong ba ka sorkaar ka buh shano ïa ki drok ba ka ju ïoh kurup ne ka buhrieh shaei. U Myntri u la ïathuh ba ka sorkar kam don kano kano kaba buhrieh ïa u drok ba ka ïoh kurup, hynrei hadien ba ladep ban pyndep bad pynbiang lut ïa baroh ki jingdonkam katkum ki kyndon, ïa ki drok ba ïoh kurup la ju thang noh kumba la thang ha kine ki bnai baladep ha ki Karkhana dewbilat.