Hapoh 7 sngi, bthah ka sorkar ban aiti ïa ka kaiphod jong ka Enquiry Committee

Shillong, Ïaiong 28: Ka Sorkar Jylla kala thung da ka Enquiry Committee kaba don 4 ngut ki dkhot ban tohkit bniah halor ka jingkynnoh ba kala don ka jingkyntait ban pdiang ban ai jingsumar ïa iwei i heprit iba la suba ba i don ïa ka jingpang ‘Rabies’ hapoh ka Tura Civil Hospital ha ka taiew kaba la dep.
Ïa katei ka hukum la pynmih da ka Directorate of Health Services (MI), hadien ba kala don ka jingmih ha ki lad pathai khubor kaba la pynpaw halor katei ka jingjia kaba la jia ha ka 25 tarik u Ïaiong.
Katkum ka jingpynbna kaba la pynmih ïa kane ka committee yn khlieh da u Dr. Sombari Boro u Joint Director of Health Services (Garo Hills Division) bad ki dkhot ki kynthup ïa u Dr. Perosh Marak u Joint Director of Health Services (MCH&FW), Dr. Cruzie N. Sangma District Medical and Health Officer ka East Garo Hills bad Dr. Valerie Laloo ka State Surveillance Officer hapoh jongka Integrated Disease Surveillance Programme (IDSP).
La bthah ïa ka committee ba kan pynlong ïa ka jingtohkit kaba bniah bha ha kaba iadei bad katei ka jingjia halor ka jingkynnoh ba la kyntait ban pdiang ban ai jingsumar hapoh ka Tura Civil Hospital.Kan khmih bniah ruh la ka don kano kano ka jingdkoh, ka jingleh thurmur ne ka jingbym pyndep ïa la ka kamram na ka liang jong ki nongtrei kiba donkti ha kaban ai jingsumar.
La bthah ïa ki ophisar ba kidei ban aiti ïa ka kaiphod hapoh jong ka 7 sngi.
“Baroh kiba don bynta, la bthah ba kidei ba kin ai ka jingiatreilang ka ba pura ïa ka committee,” la ong ha ka hukum.
Kane ka jingjia kala pynmih ïa ka jingsngewkhia halor ka rukom long jong ka rukom treikam kiba dei ban ai ïa ka jingsumar kaba mardor bad ka jingioh ïa ka lad ban ioh jingsumar kaba kyrkieh ha ki jaka sumar jong ka sorkar, khamtam eh haba suba jur ïa ka jingpang Rabies, kaba donkam kyrkieh ban ioh ïa ka jingsumar.