Hapoh 2 taïew yn pynlong biang ïa ka eksam PET ban rung kam Pulit, ong u Bah Tynsong

Shillong, Naiwieng 22: U Symbud Myntri Rangbah ka jylla uba khmih ïa ka tnat Home (Police) u Bah Prestone Tynsong ha ka sngi Thohdieng u la pyntip ba ïa ka eksam Physical Efficiency Test (PET) yn sa pynlong biang hapoh ka ar taïew.
Lah ban ong ba ka Central Recruitment Board (CRB) ka la shim ïa ka rai ban pynsangeh shwa shipor ïa ka jingpynlong ïa ka eksam PET naduh mynta ka sngi hadien ba la mih ki jingkynnoh halor ki jingdkoh jong ki kam pynlong ïa kane ka eksam.
Haba kren sha ki lad pathai khubor u Bah Tynsong u la ong, “Hynnin ka sngi ngi la shim ïa ka rai ban pynbha ïa ki rukom treikam naba ki don ki jingdkoh ha ki kam technical halor ki tiar ki tar. Nga la dep ban ong ïa ka board (CRB) ban pynsangeh shwa shipor, ban cancel ïa ka (PET) bad ban sdang biang.”
“Kan shim por kumba 1 taïew ne 2 taïew ban pynbeit ïa kine ki jingduna bad lada la lah ban pyndep ïa baroh ngin sa sdang biang ïa ka PET,” u la pynthikna.
Haba kylli na ka liang u Bah Tynsong u la ong, “Lyngba kane ka tiar yn lah ban tip ïa ki kam jong kiba aplai ha ka jingmareh kaba shisien ne kaba arsien ne haduh 10 ne 15 sien kumba la buh da ka board. Halor kane kaei kaba jia bad kaei kaba mih kan sa batai lut kumba la ai ha ki.”
“Namarba ngim kwah ban pynmih ïa ki jingartatien ïa kino kino kiba aplai, kumta nga la ong ha ki ban peit bha nangta pynsangeh shwa shipor bad ban khmih bniah bha ïa ki tiar bad shisien ba la biang lut ngin sa khot biang ïa ki kyrtong kiba ïakhun ïa ka PET na ka bynta ka Test,” u la bynrap.