Shillong, Naiwieng 6 : Ka ïing bishar High Court jongka jylla mynta ka Sngi Balang ka la hukum ïa ka National Highway Authority of India (NHAI) ban pynbha ïa ki bynta ba la sniew tam jongka surok bah NH-6 kata kaba ka jingjngai jongka ka long 102.255 Km.
Ha ka hukum ba la pynmih hadien ba la bishar ïa ka mukotduma PIL, ka ïing bishar ka la ong “ La bthah ba ïa ki bynta ba sniew eh jongka surok kaba jngai kumba 5 Km ei ei dei ban shna pynbha noh mar mar da ka NHAI hapoh ar bnai naduh ba pynmih ïa kane ka hukum”.
“ Hapoh ar taiew ba la pynpoi ïa kane ka hukum la dei ban sdang noh mar mar ïa ka kam da ka NHAI tad haduh ban da sdang ka jingshna pynbha ïa baroh shilynter ka surok. Nalor kata ïa kaba sah 45 Km dei ban pyndep noh shwa ban poi ka aiom slap ne lyiur kata hapoh san bnai. Dei ban pynthikna ruh ba ka jingtrei ka dei ban long kaba paka ba skhem bad ka ban ym pra ne jot tang shu la wan u slap” ong ka hukum.
Ka ïing bishar ka pynpaw ruh ba kam don jingartatien satia ba ka NHAI kan pyntreikam ïa kane ka hukum. “ Hynrei wat la katta ruh ngi sngewdiaw ban kynthoh ba ka jingtreikam ka suki palat pud” ong ka ïing bishar. Ka ïing bishar ka pynpaw ruh ba ka surok bah hapdeng ka Jowai bad Ratacherra ka dei kum u bud lum ïa ka Meghalaya, Tripura bad Mizoram. U Suraj Panthi u nongïasaid Amicus Curiae u la ai ïa ka kaiphod bad ki dur kiba pyni ba ki don ki bynta jongka surok NH-6 kiba la sniew shaba palat pud ha kaba la buh ruh ha ka jingeh ïa ki kali ba kin ïaid. Hynrei ka kaiphod ka khlem kdew ne pynpaw haei katei ka jaka ba sniew eh. U S Sengupta uba ïasaid na ka bynta ka NHAI u la pynpaw ba lada dei ba ïathuh ha kano ka bynta ba kane ka surok ka sniew tam un bthah ïa ka NHAI ban leh ia kaba donkam. Kumta ka ïing bishar ka la bthah ïa u nongïasaid S Panthi, Amicus Curiae ba un pyntip ne ïathuh sha ka NHAI haei katei ka bynta ba sniew eh ka surok khnang ba ka NHAI kan ïoh leh ïa kaba donkam.
