Hapdeng ka jingshongkun la pynkut noh ïa ka Behdeiñkhlam jong ka Seiñ Raij Sohkymphor

Khliehriat, Nailar 17: Ka Seiñ Raij Sohkymphor, hynnin ka sngi ka la pynkut ïa ka jingleh niam Behdeiñkhlam, ha ka rukom kaba iphuh iphieng, ha kaba la sakhi lang da u mynri ka sorkar jylla uba dei ruh u MLA ka thaiñ, u bah Kyrmen Shylla, ki MDC bad ki khun ki hajar jong ka Seiñ Raij Sohkymphor.
Ïa kane ka jingleh niam la ju leh man la u snem, mynta u snem ki la poi 13 tylli ki rong (raths) ha ka lympung, kiba la wan rah na kylleng ki dong kiba don hapoh shnong, la ong ba kane ka jingleh niam ka long ka jingngeit ban beh noh ïa ka pang ka shitom napoh shnong ha kaba la pyndep ïa ka jingleh niam da ka kñia ka khriam.
Kiba la ïa don lang ha katei ka sngi ki kynthup ruh u Deputy CEM jong ka Jaiñtia Hills Autonomous District Council, u bah Lasky Rymbai, uba la long kum u symbud kongsan ha katei ka sngi, u MDC jong ka 20- Muthlong, u bah Lomris Lyngdoh MDC Khliehriat, u MDC jong ka Khliehriat, u bah Fineliness Bareh, ki rangbah jong ka Seiñ Raij Sohkymphor, ki longkmie, longkpa, ki khun samla, ki khynnah jong ka Seiñ Raij.