Ka jingpass bha ki samla pule ha ka eksam Secondary School Leaving Certificate (SSLC) kaba la pynbna da ka Meghalaya Board of School Education (MBOSE) dang shen ka la pynlong ïa ki kmie ki kpa ban sngew sarong, sngewphuhmut phuhmat haba ki khun ba ki buh skul bad pynlut bad aiti lut nadong shadong naduh kaba sdang skul haduh ba kin da poi sha ka matrik ki la ïoh pat ban sei ïa u soh ka jingjop bad ka jingphuh samrkhie. Lada shu phai dien khyndiat sha u snem ba la dep kata ha ka samoi jong u snem 2024, ka jingdon ki samla ba ïakhun ïa ka eksam ka la kot sha ka 54,134 ngut hynrei ynda la pynbna ïa ka result pat ka jingdon kiba pass ka long tang 55.80 persen kaba mut ka jingdon ki samla kiba pass ka long tang 30,208 ngut kaba mut kumba 24,000 tam ki samla kiba phiel ne shah bat.
Lada kattei ngut ki samla kiba shah bat ne kiba phiel ha ka shisnem ka long thik kumba pynduh mynsiem ne pynïam kthang ïa kumba 20,000 hajar tylli ki longing naba khlem pep kiba bun na kine ki longiing kin dei beit kiba shu im da kaba bylla ne im da ka rep bad kumta ban phiel ha ka shisnem ka la dei ka jingduh nong kaba khraw namar sa shisien pat ki hap ban phah skul biang ïa ki khun jong ki.
Hynrei da ka jingpass bha pat jong ki samla mynta ka kynti, kane ka la pynkmen haduh katta katta ïaki kmie ki kpa namar na ki 63,682 ngut ki samla kiba ïakhun ïa ka eksam kiba pass ki la kot sha ka 55,473 ngut ne kumba 87.10 persen kaba la tam haduh kumba 31persen tam lada nujor bad ka result ha u snem 2024. Lada kren ïa ka jingshisha ka result mynta u snem ka la pynïoh mynsiem ïa ki phew hajar tylli ki longiing kiba thrang dik dik ban ïohi ba ki khun jong ki kin pass noh ïa ka matrik. Don napdeng ki longiing kiba buh thong ba tang shu pyndep ïa ka matrik kin pyrshang noh ban pynseng noh da i kam ba rit ba ria, don pat kiba kwah ban phah noh da ka diploma course lane da ka vocational course khnang ba kin lah pat ban ieng ha la ki jong ki kjat. Kiba bun na ki, ki kwah beit tang ban pass khlem da peit la ki wan ha ka kyrdan kaba nyngkong, kaba ar lane simple pass.
Tangba lah pat ban ong ba don napdeng jong ki, la kumno kumno 80 -90 persen kiba thrang dik dik ban phah ïa ki khun ban bteng ïa ka jingpule jong ki kam pher la kadei ha ka Arts, Science ne ka Commerce Stream. Ka thong jong ki ka long ba kin pyndep shwa ïa ka klas ba 12 ha shwa ba kin lah pat ban rai ba kin jam shakhmat ha ki snem ban wan ha ka jingim jong ki. Hangne ruh tden, mih sa kawei ka jingeh kumba ka la paw kylleng ki jaka. Don ki distrik kiba la tyngkhuh ïa ka rukom pynrung klas ïa ki samla pule namar ka jingdon ki seat bad ka jingbun kiba kwah ban rung ka la ïapher baklybak.
Kumta ha kane ka khep ka la pynduh mynsiem pat ïa ki kmie ki kpa bad lah ban ong ba kin don hapdeng ka jingkhuslai kaba khraw ïoh kumno re kumno ki khun jong ki, kin hap ban shongiing noh namar kim ïoh skul ban bteng pat ïa ka klass XI. Ha kum kane ka por ka donkam ïa ka sorkar ban tuklar mardor khnang ba kan ym mih kano kano ka jingkulmar naka liang ki kmie ki kpa lane na ka liang ki khynnah skul. Ka dei ruh ka kamram jong ka sorkar ba ka la dei ban pyrkhat naduh kham mynshwa ban buh ryntih lypa ïa kine kiei kiei baroh khnang ba kan ym mih ka jingkulmar ïa ki samla pule nalor ba ka pynduh mynsiem ruh ïa ki hadien ba ki la pass bha.
Donkam ïa ka tnad pule puthi jong ka jylla hapoh ka jingïalam jong u Rakkam A Sangma ban mih shakhmatbad pynshai ïa ka nongrim jong ka sorkar khnang ba ki paidbah kin ym sah ha ka umdum. Ka sorkar ka dei ruh ban pynshai kiei ki lad ki lynti bakan leh lada jia ba bun na ki samla pule kim ïoh klas lane ïoh ka la don kano kano ka jingpynkhreh lypa na bynta jong ki.
Ïa mynta hi ki kmie ki kpa kim pat dei satia ban khuslai hynrei ban long shwa kiba jai jai bad ap ïa ka rai kaba ka sorkar jylla kan pynmih ha ki khyndiat por ban wan. Lah ban kdew ruh hangne ba napdeng kiba pass ki la don haduh 22,726 ngut ki shynrang bad haduh 32,747 ngut ki dei ki kynthei. Lah ruh ba kdew ba 18,903 ngut ki khynnah ki la pass thik tang san tylli ki sobjek katba 36,570 ngut ki khynnah ki la pass baroh hynriew tylli ki sobjek. Ka jingpas jong ki khynnah ha une u snem long ruh ka rekod ba thymmai kaba tam ïa u snem 2024 kaba long tang 55.80%.
Ka jingdon jong ki khynnah kiba ïakhun ïa ka eksamin ha une u snem ka la kiew na kaba don ha u snem baladep kaba long 54,134 hajar hadien ba ym shym la pynlong shuh ïa ka Selection Test. Kane ka la long ruh kumjuh ha u snem 2021, hadien ba la pyndam noh ïa ka jingpynlong ïa ka Selection Test na ka daw ka jingwan lynshop ka jingpang khlam COVID-19. Ka jingdon jong ki khynnah kiba ïoh rung ha ka Top 20 ka la kiew na ka 85 ngut ha une u snem 2025 na ka 37 ngut ha u snem 2024.
Ki khynnah kiba la ïoh rung ha ka Top 20 ki long na ki skul kiba don ha sor bad ha ki nongkyndong, ha kaba ki ïasam mar katjuh ki kyrdan. Nalor kata, 341 tylli ki skul kiba pas 100% ha une u snem, kaba pyni ïa ka jingkiew na u snem baladep kaba long tang 180 tylli ki skul kiba pas shi spah na ka shi spah.
