Shillong, ïaïong 10: Ka Meghalaya Cricket Association [MCA] ka la jied ïa 21 ngut ki nongïalehkai kriket ki ban shim bynta ha ka prokram jied bad pynkhreh kaba khatduh lane ka final selection-cum-preparation camp naduh ka 12 haduh ka 18 tarik ïaïong na ka bynta ban jied ïa ka kynhun ka ban mihkhmat ïa ka jylla ha ka 1st North East Little Master’s Trophy 2025, ka ban long ha Guwahati naduh ka 19 tarik ïaïong.
Kane ka lympung ka dei na ka bynta ki khynnah shynrang kiba hapoh 14 snem (U-14) bad ka prokram pynkhreh jong ka Meghalaya kan long ha Nongkhrah, Ri-Bhoi. Kine ki nongïalehkai ki la shah jied lyngba ka jingpyrshang ba nyngkong ba la pynlong ha Shillong bad ha Tura naduh ka 8 haduh ka 10 tarik u ïaïong.
Baroh ki rangïalehkai kiba la shah jied ryngkat ki support staff kin mih ban leit sha Nongkhrah ha ka 11 tarik ïaïong. Ki Player bad ki support staff na Khasi-Jaintia Hills kin hap ban wanmih sha Polo Ground kaba ha Shillong ha ka 11 tarik ïaïong ha ka por 1 baje shiteng katba ki rangïalehkai na Garo Hills kin donkam ban wan beit sha Nongkhrah ha ka tarik ba la kdew. Shuh shuh, baroh ki nongïalehkai kiba la shah jied ki dei ban aiti ïa ka kopi jong ka syrnot kha, kopi jong ka Aadhaar card bad ki mark sheet 3 snem sha ka ophis jong ka MCA ha lane shuwa ka 12 tarik ïaïong.
Kine ki long ki kyrteng jong ki nongïalehkai kiba la shah jied: Sahil R Marak, Rimsrukang Ch Momin, Steve Rayan R Marak, Anurup Paul, Janggo K Marak, Tuesdream Rabha, Donsrang Chubat Sangma, Teibankhraw Mukhim, Calvin P Syngkli, Subot Kapri, Melvin Basil Warjri, Aditya Singh, Abhinav Khanal, Ashwin Shah, Jagrit Thakur, Aryan Sunar, Ayush Sangma, Abdulla Pathaw, Iaisanbha Khongji, Bansan Shaphrang Kynter, Mebanlambha Lyngshiang.
Support staff: Synrapsing Riatham (head coach), Eugene K Kharsyntiew (assistant coach), Hamboy Langbang (physio), Skhembor Khongbtep (trainer), Prewindson Sangma (manager)
