Shillong, Ïaïong 10: Kum shi bynta ban ai ka jingshakri ha kaba ïadei bad kiba pang HIV/AIDS ha kylleng ka jylla Meghalaya khamtam ïa kito kiba don sha ki thaiñ kiba kyndong ka Meghalaya Legislative Assembly ka la aiti ïa ka kali Mahindra Bolero sha ka Meghalaya AIDS Control Society (MACS). Ïa kane ka kali la aiti sha Dr. Wallambok Langstieh, Project Director ka MACS bad kiwei pat ki heh ophisar da u Malthus S. Sangma, MCS, Additional Secretary ka Meghalaya Legislative Assembly, ha ka jaka jong u Thomas A. Sangma, u Lamphang ka Ïingdorbar Thaw aiñ ka jylla.
Na ka liang jong u lamphang u la shimkhia ha kaba ïadei bad kane ka kam ban pynkhlaiñ ïa ka jingai jingshakri ïa kiba pang HIV/AIDS ha ka jylla.
Ïa kane ka kali shen yn sa aiti sha ka Meghalaya State Network of Positive People (MSNP+), ha kaba kan wad ki lad ki lynti ban lap ïa ki briew kiba la shah kheiñ kum ki Loss to Follow-Up (LFU). Kan ai ruh ki lad jingïarap ban ai ki jingpynsngewthuh paidbah bad ki prokram bapher bapher ha kylleng ka jylla.
Haba kren hadien ba la aiti ïa kane ka kali, na ka liang u Malthus S. Sangma u la ong, “Mynta ka sngi ngi la aiti ïa ka Mahindra Bolero sha ka Meghalaya AIDS Control Society. Ha ka kyrteng jong u Lamphang ka Ïingdorbar Thaw aiñ nga la aiti ïa kane ka kali sha ki ophisar jong ka MACS. Kane ka la dei ka jingangnud kaba la slem bha bad ka jingïoh ïa kane ka kali ka long ba kin lah ban leit sha ki jaka bapher bapher ban ai ki jingshakri ïa kiba pang HIV wat sha ki thaiñ nongkyndong na Shillong. Nga ngeit ba kane kadei kaba rit hynrei kan long pat ka jingïarap kaba khraw khamtam sha ki shnong kiba don shajngai na Shillong bad hapoh ka jingïalam jong u Lamphang la lah ban noh synniang ban ai ka jingkyrshan bad ban lah ruh ban ïakhun pyrshah ïa kiba pang HIV/AIDS ha ka jylla.”
