Hapdeng ka jingiphuh iphieng rakhe dap shi snem ka Synroplang VO ha Rongmesek

0

Nongpoh, Risaw 10: Da ka jingkmen kaba khraw ba kum ka kynhun jong ki longkmie kaba la tip kum ka Synroplang Village Organization kaba kdup ruh ïa ki 7 tylli ki SHG’s jong ka shnong Rongmesek ka la pynlong ïa ka jingrakhe kaba iphuh iphieng ïa ka jingdap 1 snem ka jingïaid lynti ban ai ka jingshakri na ka bynta ka imlang ka sahlang ha Rongmesek.
Ïa kane ka prokram la pynlong ha ka shnong Rongmesek ha Ri Bhoi District, ha kaba la wan ban ïa pynshit pynshngaiñ ïa kane ka jingrakhe jong katei ka VO da u Bah Jason Sawkmie Mawlong MLA ka Umsning kum u kongsan haka jingdon lang u Bah Lansius Syiemlieh, u Bah Abitius Taro Rangbah Shnong ka Rongmesek, u Cluster co-ordinator u Bah Johny Rymbai, ki Nongkitkam jong katei ka VO ba kynthup ïaka President ka Kong Blandina Sohlangpiaw bad ki dkhot jong kitei ki 7 tylli ki SHG kiba don ha ka shatri jong katei ka VO, bad la ioh ruh ban ot ia u Cake kum ka dak ka jingkmen iaka jingdap ba shi snem jong katei ka kynhun. Haba kren ha kane ka prokram kum u kongsan, u Bah Jason S Mawlong kum u nongmihkhmat, u la ai khublei kaba kyrpang ïa baroh ki nongkitkam ka VO, kiba la treishitom baroh shisnem naduh ba la thaw ïa ka ha kaban ai ka jingshakri hapoh ka shnong ka thaw ba dei lyngba ka jingïatreilang jong ki SHG’s hapoh kane ka Village Organization ba la lah ban wanrah shibun ki jingkylla hapoh kane ka shnong.
“Ki longkmie ki dei shisha kita ki paia ba synranlang ha kaban tei ïa ka longiing longsem, bad ruh kiba don ka jingkitkhlieh ban synñiang lem ïa ka jingshakri ban kyntiew ia ki shnong ki thaw bad ruh lyngba ka jingïatreilang bad ki bor shnong da ka jingïatylli kin lah ban nang pynjanai ïa ki jingshakri paidbah bad ruh ban nang kiew kum ka kynhun na kawei ka por sha kawei”, ong u Bah Jason, da kaba ai ruh ïa ka jingkitbok kitrwiang ïa kane ka VO ba kan nang lah ban ai ka jingshakri kaba janai hapoh ka shnong ka thaw.
Ha kane ka jingrakhe, la sakhi ruh ïa ka jingot ïa u Cake kum ka dak ka jingrakhe ïa ka jingdap shisnem bad la pynphuh pynphieng ruh ïa kane ka prokram da ki jingrwai bad jingshad tynrai lyngba ki longkmie na kane ka VO.

Leave A Reply

Your email address will not be published.