Shillong, June 20: U Lamphang jong ka ïing dorbar thawaiñ ka jylla u Thomas A. Sangma mynta ka sngi ula ong ba shen un sa lum ïa ka jingïalang jong ki seng saiñ pyrthei ban ïakren halor ka kam jong u Nongïalam ka Liang Pyrshah bad u Chief Whip ka Liang Pyrshah.
Hadien ba u Saleng A Sangma ula jop ïa ka elekshon MP na Tura bad ula ïehnoh ïa ka kam kum u MLA ka Gambegre Constituency, katei ka Constituency ka la sah thylli khlem don nongmihkhmat shuh. Kane ka jingïehnohkam u Saleng kala pynhiar ruh ïa ka jingbun paid ka seng Congress hapoh ka ïingdorbar thawaiñ na ka 5 ngut sha ka 4 ngut.
Lah ban ong baroh shi katta ka seng Congress ka don 5 ngut ki MLA bad ka seng All India Trinamool Congress (TMC) ruh ka don 5 ngut ki MLA, hynrei da ka jingienohkam u Saleng, ka Congress kala don noh sa tang 4 ngut ki MLA bad ka AITC kala don noh ïa ka jingbun paid kum ka seng ha ka Liang Pyrshah. Kumba long mynta u Bah Ronnie V. Lyngdoh na ka seng Congress u dei u nongïalam ka liang pyrshah ha ka ïingdorbar thawaiñ ka jylla.
ïa ka kyrdan Opposition Chief Whip, baroh shi katta la bat da u Saleng Sangma, hynrei hadien ba ula iehnoh kam kum u MLA, katei ka shuki ruh kala thylli noh. U Lamphang ula ai ksai ba yn sa shim ïa ka rai halor katei ka kam hashwa ban sdang ka dorbar jongka ïingdorbar thawaiñ ka jylla.
Haba jubab halor ka jingpynkhamti ïa ka kam Leader of Opposition bad Opposition Chief Whip sha ka seng Congress watla ka Congress bad ka AITC ki don mar 5 ngut ki MLA, u Lamphang ula pynshai ba ka Voice of the People Party (VPP) ka la phah ïa ka jingtyrwa ïa ka kyrteng jong u Saleng Sangma na ka bynta ka kyrdan Opposition Chief Whip ha u snem 2023. Kane kala lam ïa ka seng Congress ban ïoh ïa ka kyrdan Leader of Opposition. Kane ka jingkren u Lamphang kadei hadien ba u Saleng Sangma ula resaiñ noh kum MLA ka Gambegre constituency.
