Shillong, Jylliew 20 : U Myntri Rangbah ka Jylla Conrad K Sangma mynta ka sngi Palei, ula lum ïa ka jingïalang ban ïamir jingmut halor ka jingpynwandur bad pynitynnad ïa ka thaiñ Umiam, bad ban pynlong ïa kane ka jaka kum ka Tourist Hub bad ban shna ïa ka jaka pynkamai helicopter. Halor kane ka tnad Forest shen kan sa aiti ïa ka jaka ba 300 acre sha ka tnad Tourism na ka bynta ban pynïaid shakhmat ïa kane ka projek bad ba kan long kum kawei na ki jaka jngoh kai ba heh ha kane ka jylla bad thaiñ hi baroh kawei.
Haba kren sha ki lad pathai khubor hadien ka jingïalang u bah Paul Lyngdoh myntri ka tnad kam jngohkai ka sorkar jylla ula ong “Kane ka dei ka project ba thrang bha khnang ban pynïar ïa ka jingtreikam ka MTDC ban wanrah kham bun ki lad jingshakri, ban pynbun shuh shuh ïa ki jaka pynbyrngia bad ban pynbun ïa ki jaka sah na kaei kaba don mynta hapoh ka Orchid Lake Resort”.
Ula pyntip ba ka tnad Forest ka la mynjur ban ai ïa ka jaka ba 300 acre ha ka ban kyntiew ïa ka kam jngohkai hapoh ka thaiñ. “Ngi kwah ba ka Umiam kan dei ka jaka ba khring bha ïa ki nongshang suwari, ym tang ha Meghalaya hynrei ha ka thaiñ Shatei Lam Mihngi baroh kawei” ula bynrap.
Haba kren halor ki kam ban pyntrei, u Bah Paul ula pyntip ba kan don shibun ki jingpynbyrngia ïa ki nongshangkai pyrthei khamtam ka water sports. “Kan don ruh ka jaka ïaid kai ha Nehru Park, ki jaka ïalehkai ïa ki Khynnah, ki adventure sports bad kiwei kiwei” ula ong.
Haba kren halor ka jingjaboh jong ka pung Umiam, u Bah Paul ula ong ba ka jingpynkhuid ïa ka wah Umiam ka dei kaba kongsan bha ha kane ka jingthmu. “Ngi don jingthmu ban pynkhuid ïa ka pung Umiam. Ka Tnad Power ka la ïoh ïa ka bynta ban pynkhuid ïa ka pung, ka ban sa sdang shen” ula ong haba pyntip “La khmih lynti ba ka jingpynkhuid kan sa sdang hapoh ka hynriew bnai”.
Haba kynthoh halor ka hukum ka ïing bishar High Court ban khang ban tei jingtei hajan ka pung Umiam, u Bah Paul ula pynthikna ba ki kam ki ban sa pyntrei kin long sha ki jaka lum ym shajan jong ka Pung. “Ngin sa ïoh 300 acre ka jaka kaba kham pajih na ka pung” ula batai.
U Bah Paul ula pyntip ruh ïa ka jingthmu ban wanrah ïa ka jaka pynkamai helicopter ha Umiam ka ban pynïasoh bad kiwei ki jaka jngohkai ki ba don ha Jylla Meghalaya.
“Kum ka nuksa, na Umiam sha New Shillong, New Shillong sha Sohra. Kane ka jingpynïasoh kan khring bha ïa ki nongshangkai pyrthei ba heh spah ki ban sa pynlut kham bun, watla ka jingwan jong ki kan long kaba duna” ula pynkut.
