Shillong, Nohprah 16: Ka Seng Hynñiewtrep Integrated Territorial Organisations (HITO) ha ka sngi Nyngkong ka la leit ïakynduh ïa u Dy. Director ka Directorate ka Mineral Resources ka Sorkar Jylla ban buddien halor ka jingdie lilam ïa u dewïong da ka Coal India Limited (CIL).
Hadien kane ka jingïakynduh haba kren sha ki lad pathai khubor, u President ka HITO, u Bah Donbok Dkhar u la ong ba ha ka jingwan ïakynduh ha kane ka sngi ka la buh ha ka jinglyngngoh ïa ka seng ba ka dorkhas kaba la ai da ka seng naduh ka 27 tarik u Rymphang 2024 , ka la jah na kane ka ophis, kumta ka seng ka la buh biang da kawei pat ka dorkhas bad kan ap ïa kane ka tnat ba kan shimkhia halor kine ki jingujor.
Katba u Bah Wanbud N. Dkhar, u General Secretary ka HITO, u la ong ba ha ka jingbuddien ïa ka dorkhas kaba la phah, ka long kumba u Director u ba la shongthait, u la shongthait bad rah lang ïa ka jingujor ka seng namar haba ki wad ïa ka file ha kane ka sngi la shem ba kam don shuh ha kane ka ophis.
Na ka liang jong u, u la ïathuh ba ka jingwan buddien ha kane ka sngi ka long halor ka jingshalan bad lilam ïa u dewïong u ba la dep ban tih sha ka Coal India Limited.
“Kumba la ïohi ba mynta ka jingshalan ïa u dewïong ka la ïaid shaid shaid, ka seng ka kwah ban tip la ka dei kaba la leh katkum ka aiñ ne kaba la leh be-aiñ,” bynrap u Bah Wanbud.
Halor kane u la ïathuh ruh ba ka don ka jingujor na ki trai par ba hadien ba la dep ban siew ïa ki khajna ki ba pher bapher ki hap ruh ban siew shuh shuh ïa ka pisa kaba ym dei hok, kumta halor kane u la ong ba ka seng ka kwah ban wad jingtip halor kine ki jingsiew kiba hap ban siew tam.
