Shillong, Nailar 10 (PIB): Ka Election Commission of India mynta ka sngi ka la pynlong ïa ka conference bad ki Chief Electoral Officer jong ki jylla/UT kiba la dep pynlong elekshon bad ki jylla/UT ki ban dang long elekshon ha ka India International Institute of Democracy and Election Management, New Delhi.
Katkum ka jingpyllait khubor ka PIB, la ong ba ki CEO na kiwei kiwei ki Jylla/UT ki la ïashim bynta lang ha kane ka conference lyngba ka video-conferencing. La pynlong ïa kane ka jingïalang ban ïasam jingnang jingtip kiba la ïoh na ka jingpynlong elekshon ha ki jylla ha u snem 2021 bad 2022, ha kaba la don ruh ka jingiamir jingmut halor ka jingpynkhreh ban pynlong elekshon, ka jingpeit ïa ka jingpynlut pisa, ka electoral roll, ki IT Application, ka jingpeit ïa ki jingtip ba don, EVM/VVPAT, SVEEP strategy, ki lad ai jingtip bad kiwei kiwei.
Ha ka jingai jingkren jong u, u CEC Rajiv Kumar u la ai jingïaroh ia ki CEO jong ki jylla ba la pyndep ïa ka jingpynlong elekshon ha ki por ba bun bha ki jingjynjar. U la ong ba ki rukom treikam jong kine ki jylla ki dei kiba hap ban pynbud khlem da pyntlot ïa ka burom jong ka rukom pynlong elekshon. U la ong ba dei ban peit bha ïa ki sienjam bad ki jingsaiñdur thymmai jong ki CEO na ka bynta ka jingpyndonkam ïa ka IT ha ka jingpyniaid ïa ki elekshon ha kaba ïa ki rukom treikam ba lah ban pyndonkam dei ban pynskhem shuh shuh bad ban thep lang ha ki rynsan ECI IT / ki App khnang ban lait na ka jingtrei arsien ïa kajuh ka kam. U Rajiv Kumar u la kren ruh shaphang ka jingdonkam ban pyndonkam ïa ka jingstad science ban peit ïa ki kam elekshon khnang ban lah ban pyndonkam bha ïa kine ha ryngkat ka rynsan digital khnang ban suk ka jingpynsaphriang jingtip ba la saindur da ki jylla bad ka ECI. La bthah ïa ki CEO ba kin pynthikna ban khot ïa ki nongmihkhmat na ka kynhun National & State Disaster Response Force ban ïakren shaphang ki kam kiba hap ïatrei lang. Namar ka jingkylla ha ki kam pyniasoh bad ka teknoloji, u la ong ba dei ban leh ïa ka geo-tagging ïa ki polling station bad ba ki bor pyniaid distrik ki dei ban peit biang ïa ki route chart.
Ha ka jingiakren shaphang ka jingai jingtip ïa ki nongthep vote, u CEC u la ong ba ka kam SVEEP ka dei ban poi sha ki kyndong kynshrot bad ka dei ban peit bha ïa ki polling station ba duna ka jingwan thep vote ki briew khnang ban lah ban pynbeit ïa kane. U la kyntu ïa ki CEO ba kin ai jingtip na ka por sha ka por sha ka ECI na ka bynta ka jingpynbha shuh shuh ïa ka rukom treikam bad ka jingkyntiew ïa ka jingplie lad ia ki briew ba wan thep vote.
U Election Commissioner, u Anup Chandra Pandey u la kren shaphang ka jingdonkam ban pyrkhat thymmai bad ruh ban bud ïa ki rukom treikam kiba biang tam ha ki jylla bapher bapher. U la ong ba ki rukom treikam ba biang tam da ki jylla bapher bapher ha ki elekshon ba la dep ki long kum ka jingpyndonkam ïa ki road map da ka Tamil Nadu, Chatbot da ka Goa, Learning Management System da ka Assam, ki sienjam ba kyrpang na ka bynta kito kiba don jingduna ha ki dkhot met da ka Uttarakahnd, Meghdoot postcard na ka bynta ka jingai jingtip ha ka jingiatrei lang bad ka tnat ïing dak, mobile app ANUBHAV ban plié lad ïa kito kiba don jingduna ha ki dkhot met da ka West Bengal. U Pandey u la ong ba ki kynhun jong ki CEO ki dei ban long kiba peit bniah khnang ban pynthikna ïa ka jingbat ia ka burom jong ka jingpynlong elekshon bad ban shim ïa ki sienjam kiba tyngeh katkum ka ain ia kito kiba pynkhein ïa kane.
Halor ka kam ba dang shen jong ka Commission na ka bynta ka jinglum AADHAAR, u Pandey u la ong ba ka long kaba donkam bha ban bat ïa ki kyndon ka ECI haba lum ïa ki jingtip. U la ai jingiaroh ïa ki CEO ba naduh ba la sdang ia kane ka kam naduh ka 1 tarik u Nailar, 2022 palat 2.5 klur ki AADHAR ki dei ba la lum lyngba ka jingai kylluid mynsiem ki briew.
Ha kane ka jingialang, ka Commission ka la pynkup burom ruh ia ki ophis ka tnat kam pohiing, ki kynhun Central Armed Police Force bad ka tnat rel kiba la nohsynniang bha ha ka jingpynlong ïa ki elekshon sha ki iing dorbar thawain ha ka rukom kaba iaid beit, kaba shai bad kaba lait na ki jingkulmar ha u snem 2022. Kine ki kynhun ki la hap ban leit sha ki jaka kiba jynjar ban poi bad kiba jngai bad na kawei ka jylla sha kawei pat ha ka jingai jingshakri jong ki ha katei ka por na ka bynta ka jingiaid beit ka kam pynlong elekshon. U CEC, u Rajiv Kumar u la ai jingïaroh ia ki halor ka jingpynkhreh kaba bniah bad ka jingleit pyndep kam ha ka por kaba biang ha kine ki elekshon sha ki ïing dorbar thawain ha u snem 2022. Ka Commission ka la ai ruh ïa ka grant of honorarium sha ki ad-hoc Commandant/Commandant jong ki kynhun kiba hap ai jingshakri ha ka por elekshon ba pynlong da ka Election Commission of India.
Ha kane ka sngi, ka Commission ka la pyllait ruh ïa ka A-WEB India Journal of Elections kaba thymmai. Kane ka dei ka kot kaba don ia ki jingthoh bad ki jingai na baroh ki bynta ka kynhun A-WEB. Ka A-WEB ka dei ka kynhun kaba heh tam jong ki kynhun kiba peit ïa ki kam elekshon ha kylleng ka pyrthei.
Ki CEO jong baroh ki jylla kiba la dep pynlong elekshon ki la ai jingtip shaphang ki jingshem jong ki bad ki jingsaindur thymmai jong ki ba la pyndonkam ha ka jingpynlong ia kine ki elekshon. Ki CEO na ki jylla ban pynlong elekshon ki la batai shaphang ki kam ai jingtip, bad kiwei kiwei ki kam jong ki na ka bynta ka jingpynthikna ïa ka jingskhem bad ka jingkhlain jong ka electoral roll ha baroh ki Assembly konstituensi jong ki jylla jong ki.
