Jowai, Risaw, 31: Ka jingbteng jong ka jinglong ktieh jong ka Wah Myntdu kaba dei ka nongbsa umbam ïa ki nongshnong shnong ka sor Jowai, mynta ka sngi ka Khooid Ya Ka Wah Myntdu (KYM) kala leit ban ujor sha u Deputy Commissioner ka West Jaiñtia Hills District halor ka jinglong jingman jong ka Wah.
Ka seng kala pyntip sha u DC kane ka jinglong ktien ka Wah Myntdu kala wan jia ha ka 27 tarik u Nailur bad kumjuh ha ka 23 tarik 24 bad ka 30 tarik mynta u bnai Risaw bad kane kala wan rah ïa jingjaboh jong ka umbam umdih kaba la pynpoi da ka tnad PHE sha ki nongshong shnong.
Ka seng kala ïathuh ba kane ka jingjaboh ka Wah Myntdu ka dei na ka daw ka jingpyntuid pathar ïa ki jaboh jabaiñ, ka jingtih maw bad khar shyiap beaiñ kumjuh ka jingthep khyndew sha ki bynta ka Wah Myntdu kaba la pynlong um ktieh ha shi lynter jong ka Wah.
Halor kane ka bynta ka Khooid Ya Ka Wah Myntdu (KYM) ka kwah ban ïoh jingtip na ka ophis u DC, ha ei la pyndonkam ïa ka pisa ba la dep buh kyrpang haduh 5 lak tyngka kaba la ai da u ma F. Hinge ïa kaba la thep ha ka 8 tarik u Kyllalyngkot, 2024 ha ka A/c Nos: 096001000454 IFSC code ICICI 0000960 MICR code: 793229501 jong ka sorkar kaba long na ka bynta ban ïada bad ban pynmiat pynbha ïa ka Wah Myntdu.
