Mawkyrwat, Risaw, 31: Kawei ka longïing ha shnong Nongkynbah, South West Khasi Hills District kaba jngai kumba 20 kilometer duna ei ei na District Headquarter ka la shah bam duh ha ka ding ha ka miet sngi saitjaiñ, ka 26 tarik u Risaw 2025, kaba la wanrah ka jingduh nong kaba khraw ha kaba la shu antad ba ka jingduh nong ka la poi da ki phew lak tyngka ei ei.
Ka Kong Saralin Kharmawlein, kaba dei ka trai ïing na ka shnong Nongkynbah, ka la ong ba ha ka por jingjia ym shym la don mano mano ha ïing namar ma ka ruh ka dang leit shim dawai sha Shillong. Hynrei halor kane ka jingjia la shu ïoh jingtip pateng lyngba ki paralok bad ki para shnong kiba la tip ïa ka por ba ka ïing jong ki ka la kem ding.
Ka la ïathuh ruh ba ki para marjan bad ki nongshong shnong ki la pyrshang ban ïa pynlip ïa ka ding bad ban pyllait ruh ïa ki tiar ba don ha ïing, hynrei namar ka jingklang bad ka jingpur stet jong ka ding ba rhem kim shym la lah ban leh ei ei.
Ha kane ka jingjia, la pynthikna ba ym shym la don mano mano ba mynsaw lait tang ka jingduh ïa ki jingdon jingem kiba don hapoh ïing.
