Hakhmat Gate ka ophis JHADC shnong kyllaiñ myngor ki dkhot ka VPP bad ki nongtrei

Jowai, Nailur 28: Ki nongïalam ka Voice of the People Party (VPP) Jaiñtia Hills ki la pynlong da kaba shong kyllaiñ myngor hakhmat ka khyrdop (Gate) jong ka ophis ka Jaiñtia Hills Autonomous District Council (JHADC), ban pynpaw ïa ka jingsngew diaw halor ka jingbym ïoh tulop ki nongtrei jong kane ka ophis mynta la 9 bnai.
Kane jingïakhih jong kaba la sdang naduh ka 10 baje mynstep ka la kut haduh ka 5 baje janmiet.
Na ka liang u Organizing Secretary ka VPP Jaiñtia Hill u ma Chanbor Rymbai ula ong ba jingthmu jong ki ban pynlong ïa kane ka jingïakhih ba jai jai ne ka shong kyllaiñ myngor ha phyllaw ka ophis jong ka JHADC, hynrei ki pulit kim shah ïa ki ban pynlong ka jingïakhih kaba jai jai hapoh phyllaw ka JHADC, kumta kila hap ban pynlong ïa kane ka hakhmat Gate ka ophis JHADC.
U Damenhi Rymbai President VPP East Jaiñtia Hills ula kyntu ïa ki nongkyshan ïa kane ka jingïakhih jong ki ban ïasnohktilang na ka bynta ka jingshah leh beiñ ki nongtrei kane ka ophis ha ka jingïadei bad ka tulop jong ki kaba kim pat shym la ïoh naduh ba sdang jong une u snem 2024.
Ha ka por 1 baje shiteng la wan mih ki bor District lyngba ka kong B. Blah, MCS Additional Deputy Commissioner ban ïakren bad ki nongïalam ba hakhmat ka VPP halor ka jingpynlong jong ki ïa katei ka jingïakhih ba jar jar. Hadien ka jingïakren kitei ki nongïalam ka VPP ki la shim beit ïa ka rai ban pynkut ïa kane ka jingïashong kyllaiñ myngor ba jai jai haduh ka por 5 baje janmiet.