Haduh phyllaw ïing hiar ki nongtrei sorkar ban pynsngewthuh ïa ki skhim bapher bapher

Mawkyrwat, Risaw 08 : Ka ophis jong u Block Development Office (BDO) jong ka Mawkyrwat C&RD Block lyngba ka Block Mission Management Unit, ka Meghalaya State Rural Livelihood Mission (MSRLS), National Rural Livelihoods Mission (NRLM) jong ka Mawkyrwat Block bad ka Tehsonglang Cluster Level Federation jong ka Jakrem Cluster mynta ka sngi ka 08/10/2025 ki la pynlong ïa ka Convergence-cum-Enrollment Camp ne ka jingïasynrop lang jong ki tnad treikam jong ka sorkar ha ki bynta bapher bapher, ha shnong Phlangkynshi, South West Khasi Hills District ha ryngkat ka jingïatreilang bad ki 5 tylli ki shnong.
Ka jingthmu jong kane ka camp ka long ban pynïasoh lang ïa ki tnad treikam jong ka sorkar lem bad ki paidbah jong ki shnong, ban ai jingtip shaphang ki skhim bapher bapher ba la kyrshan da ka sorkar India bad ka sorkar Meghalaya bad ban pynrung kyrteng ha ki jait skhim ne ki hok ba ki paidbah ki dei ban ioh ïa ka bynta jong ki.
Ha kane ka Convergence-cum-Enrollment Camp, na ka liang ki paidbah nongshong shnong ki la ïoh jingmyntoi ha kaba ki la ïoh ban pynrung kyrteng na ka bynta ki jingmyntoi ha ka Aadhar enrolments 20 ngut, ha ka Smart Card/MHIS 32 ngut, kiba pynrung ha ka E-Shram 2 ngut bad 6 ngut kiba plie accounts thymmai bad kiwei de kynthup ïa ki jingai jingpynshai paidbah na ki 6 tylli ki tnad treikam jong ki ophis sorkar kiba hapoh ka South West Khasi Hills District.
U kongsan ha kane ka sngi u dei u bah S.K. Budnah, ha ryngkat ka kong Balasiewdor Lyngdoh, District Functionalist Specialist MSRLS, South West Khasi Hills District, Mawkyrwat C&RD Block, ka kong Nisaka Dkhar, Junior Rural Development Officer hapoh ka ophis jong u BDO Mawkyrwat C&RD Block, u bah O.P. Marngar, Myntri Shnong Phlangkynshi Mihngi kiba la ai jingkren lem bad kiwei de.
Ha kane ka sngi la ïoh ruh ka jingsam ïa ki syrnod sha ki longkmie kiba la ïoh ban pyndep ïa ki jingshah hikai ha kaba dei bad ka jingsuh jaiñ ba 3 bnai ba la pynïaid da ka Tehsonglang Multipurpose Cooperative Society Limited lyngba ka USHA SILAI – Training Centre-cum-Production Centre.
Kham hashwa, ka kong Shimtilin Marngar ka la pynïaid ïa ka jingïalang, ka kong Biloda Iawphniaw ka la ai ki jingkren pdiang bad ka kong Kynnohpa Iawphniaw, Assistant Secretary CLF ka la ai ki kyntien khublei.