Shillong, Nailur 10 : Ka Mynken Christian HS School, Ri Bhoi District ka la ïoh ban thep haduh 39 tylli ki kol tang haduh ka semi final jong ka Subroto Cup U-17 kaba dang ïaid mynta ha nongbah Delhi.
Kane ka kynhun na ka Jylla kan hap ban aireng pyrshah ïa ka kynhun ïalehkai na Manipur, ka TQ English School ha ka final kaban long mynta ka sngi Balang.
Tang ha ka jingïakhun ha ka League, ki kol ba ka Mynken ka ïoh ban thep ki kynthup haduh 23 -0 kol ïa ka skul St. Francis Xavier High School Dudhani, Silvassa na Daman and Diu ha ka jingiakhun kaba la khlain shilliang bha.
Nangta pat ka ïoh ban jop da ka said, kata tang da 1-0 kol ïa ka Chandigarh, ha shwa ba kan pynliem pat ïa ka Bihar haduh 5-0 kol ha ka jingiakhun kaba bud.
Haba la poi pat ha ka jingïakhun ha ka quarter final, ka Mynken ka la ïoh ban jop da 3-1 kol ïa ka CISCE hapdeng ka jingïakhun kaba itynnad bha namar katei ka kynhun ka la ioh lad ban pynphai lang shi kol.
Ka jingïalehkai kaba kham itynnad ïa ka Meghalaya kadei pyrshah ïa ka skul na Arunachal Pradesh ha kaba la ïohi shisha ïa ka jingtbit ki rangïalehkai jong kane ka skul na kane ka jylla.
Kane ka kynhun ka la ïoh ban thep haduh 7-0 kol ïa katei ka kynhun na Arunachal bad ka jingjop jong ka Mynken ïa katei ka skul ka la pynlong ruh ïa kiba bun ban don lypa ka jingkyrmen ba kan khur ïa ka nam lahduh mynta u snem.
Haba phai pat sha ka Manipur, ka kynhun ba ka Mynken kan ïakhun ha ka final, kane ka kynhun ka la ïoh ban thep 14 kol naduh kaba sdang haduh ban da poi sha ka semi final. Ha ka jingïakhun ha ka Leagaue ka la jop da 7-0 kol ïa ka Madhya Pradesh, nangta 4-0 kol ïa ka Nepal bad ïakhaid mar 1-1 kol bad ka West Bengal.
Ha ka Quarter final pat ka la jop da 1-0 kol ïa ka CBSE. Kane ka kynhun ka la jop biang da ka said ïa ka Sri Lanka kata da 1-0 kol ha ka jingïakhun ïa ka semi final ha katei ka lympung.
