Haduh 30 ngut ki samla ki ban sdang ïa ka jingshah ai jinghikai ha WJH

Jowai Risaw 12: Kawei na ki kynhun treimon sngewbha ka Mihmyntdu Community Social Welfare Association (MCSWA) mynta ka sngi kala plie ïa ka jaka ai jinghikai ïa ki samla ha kaba ïadei bad ka rukom ai jingsumar ïa ki nongpang ha ki ïing ki sem ne ka ‘Home Health Aide Skill Training’ kaba don ha Salaroh Jowai, kane ka jaka ai jinghikai ka long shi bynta na ka Skills Meghalaya bala ïarap pisa lyngba ka Meghalaya State Skill Development Society (MSSDS).
Ha kane ka sngi la wan ban plei paidbah da ka kongsan ka kong D.D Syngai MCS Additional Deputy Commissioner ka West Jaiñtia Hills District, katba ki samla kiba sdang ban ïoh jinghikai ki don haduh 30 ngut bad ha ka juh ka por la kitbok ïa kitei ki samla ba kin long kiba mihnot ban wan sha ka jingshah ai jinghikai tad haduh ban da dep jong ka Course.
Ha kane ka jaka ai jinghikai yn ai jingbatai ba bniah ïa ki nongshah hikai ba kin tip ïa kiba bun ki jait sumar ïa ki nongpang katkum ka jingdonkam jong ki ha ki ïing ki sem naduh ka rukom thew ïa ka jingkhia, BP, shini, rukom dih dawai ba la bthah da ki Doctor, ka jinglehkhuid ïa ki nongpang nalor kiwei kiwei de. Ha kaba yn wan ban ai jingïarap lang da ki katto katne ngut doctor hapoh kane ka jaka ai jinghikai.
Ka Dr. J.N Shullai kaba dei ka Director jong ka SDO-MCSWA kala pynsngew ba ka jingthmu ban plie ïa kane ka jaka ai jinghikai halor ka nongrim hadien ba kala ïohi ïa ka jinglong jingman jong ka juk ba mynta, ha kaba ïadei bad ka jingai sumar ïa kiba ha ïing hasem namar kumba long mynta kiba bun hi kim don por shuh wat tang ban pynbiang lane ban ap ïa ki kiba pang ba shitom la ha ki Hospital bad kumjuh ha ki ïing ki sem.
“Kum kine ki jaka ai jinghikai kan ïarap shibun eh ïa ki samla kiba khlem kam khlem jam kiba la dep ruh ïa ki jingpule ha ki kyrdan bapher bapher da kaba kyntu ïa ki samla ba shong khlem kam ba kin wan wad jingtip na ka ophis MSSDS kaba don ha DC ophis, khnang ban ïoh ïa ki jingtip shaphang ki kam ai jinghikai naduh ki kam suh jaiñ, Tourism, ki kam shna lait (electrician) bad kiwei kiwei de. Ong u ma Lambormi Suchen (SDO-MSSDS).
Kiwei de kiba ai jingkren ha kane ka sngi ki kynthup ïa u ma Dame H. Pde na ka Symjuk ki Waheh Shnong Jowai, ka Dr. N. Nongpluh ka Medical Superintendent ka Narman Tunnel Hospital Jowai, u ma Aris Nong kynrih Chief Functionary, MCSWA, ha ryngkat ka jingdonlang ki samla ban shah hikai nalor kiwei de kiba la shah khot sngewbha, katba ïa ki kyntien ai khublei la ïoh na ka samla Spero M. Lamare.