Shillong, Nailur 25 : Ki la don haduh 214 ngut kiba la shitom na ka daw jong u Niangpyrsit (Measles) ha ki 11 tylli ki jingjia ha kylleng ki bynta jong ka jylla naduh u Kyllalyngkot haduh u Nailar mynta u snem, ong ka State Immunization Officer, Dr. Badira Mawlong haba kren bad ki lad pathai khubor ha kane ka sngi Palei.
“Ki dang don bun bha kiba kyntait ban ai tika bad kane ka pynlong ïangi ban sngewkhia bha,” ka la bynrap biang.
Shuh shuh ka la ïathuh ruh ba teng teng ki paidbah ki phah ai tang ka tika ba nyngkong bad ki sangeh noh pat ban ai ha kaba ar. “Ha ka imlang sahlang jongngi lei lei ki ngeit ba u Measles u dei u ñiangblei bad ba ym dei satia ban pynthut ïa i khunlung. Hynrei ha ka jingshisha, ka bor met jong i khunlung ha ka por ba i ïoh ïa u ñiangpyrsit ka tlot bha bad ki bacteria kin shim ïa ka jingtlot jong i. Bunsien hi, ki khunlung ki duh ei ïa ka jingim tang na ka daw ka jingdap shadem (Pneumonia), pynhiar bad khie shit,” ong ka Dr. Mawlong.
Nalorkata, ka ïathuh ruh ba ki don ki khunlung kiba khie shit ne pun ksuit ka sniedoh bad kumta ki hap ban shim ïa ka snam hynrei hangne ruh ki kmie ki kpa ki kyntait naba ki ong ba kim lah ban pynthut ïa ki khun.
Katkum ka jingiathuh jong ka, ki don ruh ki khep ba don kiba matlah ruh na ka daw ka jingpang ñiangpyrsit.
“Ngi tip ba ïa kane ka jingpang ki paidbah ki khot ba dei u ñiangblei hynrei la katta ruh donkam ban ai tika khnang ba kin ym ïoh shuh bad lada ki ïoh ruh un ym da pynshitom than eh bad kam don jingma ruh ïa ka jingim jong ki. Watla ki khunlung ki shitom khie shit bad don jingpang ha ka sniehdoh hynrei lada ki shah ban test snam, ngi lah ban tip la ka jingpang kadei na ka daw u ñiangpyrsit lane na kiwei pat ki jingpang. Lada jia ba u dei ruh ki khunlung kin lah ban ïoh ïa ki jingsumar kiba ïadei,” la bynrap biang.
La ïathuh ruh ba ka jingngeit biej ban ym shah ai tika kadei ka daw kaba kongsan bha ha ka jingkiew kiba ïoh pang ñiangpyrsit. “Tangba don ruh kiba kyntait ban ai tika khlem da batai shai ïa ka daw balei kim treh. Don pat kiba tieng ban ai namar ki tieng ba ïoh khie shit hadien ba la dep ban ai tika.”
Na ka liang u Director ka NHM, Ram Kumar u la ïathuh ba ha ka jylla hi kumba 90 persen ki la dep ban ïoh ïa ka tika. U ong ruh ba na bynta kito kiba la ïoh ïa ka tika ki don ka jingtikna ba kin ym ïoh shuh ïa katei ka jingpang. Ha kajuh ka por u ong ruh ba kito kiba don ïa ki dak jingshitom kum ka khie shit ne kynja jingpun ksuit ha ka sniehdoh ki lah ban pyntip mardor sha ki lad ai jingsumar khnang ban ïoh pynstet ïa ka jingsumar.
